Waqooyi Bari (Dawan) – Madaxweynaha Waqooyi Bari, Cabdikadir Axmed Aw Cali, ayaa shalay si rasmi ah u dhagax-dhigay waddo cusub oo isku xiraysa caasimadda Laascaanood, isaga oo sheegay in mashruucani uu saameyn weyn ku yeelan doono horumarka magaalada iyo guud ahaan gobolka.
Madaxweynaha ayaa sheegay in waddadan cusub, oo dhererkeedu yahay 3 kiiloomitir iyo 200 mitir, ay fursad u tahay bulshada iyo dowladda inay si wadajir ah uga shaqeeyaan horumarinta deegaannada kala duwan ee gobolka. Waxa uu xusay in mashruucan la filayo inuu si weyn u xoojiyo isku xirnaanta magaalooyinka iyo qaybaha kale ee gobolka.
“Waddadan cusub waxay ka mid tahay qorshayaal waaweyn oo lagu horumarinayo deegaanka iyo bulshada Waqooyi Bari,” ayuu yiri Madaxweynaha, isagoo tilmaamay in mashaariicda waddooyinka iyo dhismayaasha kale ee muhiimka ah ay door weyn ka qaadan doonaan horumarinta dhaqaalaha iyo xoojinta amniga gobolka.
