Madaxweyne Xasan oo sheegay in Soomaaliya ay la daagaali doonto Israa’iil

Qadar, 7 Febraayo 2026 (Dawan) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa sheegay in dalkiisu uu iska difaaci doono isku day kasta oo ay Israa’iil ku doonayso inay ku yeelato saldhig militari, isaga oo su’aal ka keenay sababta Israa’iil ugu baahan tahay joogitaan militari gudaha Soomaaliya.

Isagoo la hadlayay Al Jazeera intii lagu guda jiray Madasha Al Jazeera Forum ee ka socotay magaalada Doha maanta oo Sabti ah, Madaxweyne Xasan ayaa sheegay in saldhig militari uusan lahayn ujeeddo difaac oo ay Israa’iil uga baahan tahay Soomaaliya, isla markaana uu muujinayo ujeeddo collaadeed oo kaliya.

“Saldhig ma aha xarun dalxiis; waa goob militari, militariguna wuxuu la macno yahay weerar ama difaac,” ayuu yiri Madaxweyne Xasan Sheekh Maxamuud, isaga oo raaciyay “Ma jirto meel ay Israa’iil ka difaacan karto Soomaaliya.”

Madaxweynaha ayaa sheegay in dowladda Soomaaliya aysan arag wax ciidamo Israa’iili ah oo ku sugan dalka gudihiisa, isla markaana uusan filayn in ay yimaadaan mustaqbalka dhow, balse wuxuu ka digay in tallaabo kasta oo noocaas ah si adag looga hortagi doono.

Markii la weydiiyay tallaabada ay Soomaaliya qaadi doonto haddii la dhiso saldhig militari oo Israa’iili ah, Madaxweyne Xasan ayaa yiri: “Waan dagaallami doonnaa inta aan awoodno. Dabcan waan iska difaaci doonnaa.”

Illaa iyo hadda ma jiro wax xaqiijin rasmi ah oo ku saabsan qorshe ay Israa’iil ku doonayso inay saldhig militari kaga dhisto Soomaaliya, mana jirto wax war ah oo ay Israa’iil ka bixisay hadalka Madaxweynaha.

Soomaaliya waxay ku taallaa gobol istiraatiiji ah oo ka tirsan Geeska Afrika, kuna dhow marinno badeed muhiim u ah ganacsiga caalamiga ah, taas oo ka dhigtay goob ay muddo dheer dano siyaasadeed iyo amni ku lahaayeen quwadaha gobolka iyo kuwa caalamiga ah.

Arrinta la xiriirta suuragalnimada in Israa’iil ay saldhig militari ka sameysato Soomaaliya ayaa soo ifbaxday kaddib markii Israa’iil ay aqoonsatay Somaliland, inkastoo Somaliland iyo Israa’iil midkoodna si rasmi ah u xaqiijin arrintaas.