Mahdi Guuleed oo difaacay qorshaha wax ka bedelka Dastuurka

Soomaaliya (Dawan) – Xildhibaan Mahdi Maxamed Guuleed, oo hore u soo noqday Ra’iisul Wasaare ku-xigeenka Soomaaliya, ayaa sheegay in uusan jirin gobol ama beel Soomaaliyeed oo dhammaystirka dastuurka wax u dhimayo ama danohooda ka soo horjeedo.

Hadalkan ayaa ku soo beegmaya xilli ay sii xoogaysanayaan doodaha la xiriira wax-ka-beddelka iyo dhammaystirka dastuurka dalka.

“Aad ayaan u akhriyay dastuurka, mana aanan garan gobol ama deegaan Soomaaliyeed oo uu lid ku yahay, ama wax dantooda ah aanu xusin. Sidoo kale, ma aanan garan reer Soomaaliyeed oo dhammaystirka dastuurku uu ka horjeedo, ama afartii cutub ee hore ay lid ku ahaayeen oo ay diiddan yihiin,” ayuu yiri Mahdi Maxamed Guuleed.

Hadalkan ayaa salka ku haya doodaha sii kordhaya ee ku saabsan isbeddellada lagu samaynayo dastuurka Soomaaliya. Xildhibaan Mahdi Maxamed Guuleed ayaa si cad uga soo horjeestay eedeymaha qaar ka mid ah siyaasiyiinta mucaaradka ah, kuwaas oo ku dhaliila dowladda in dastuurka loo adeegsanayo dano gaar ah, iyaga oo ku tilmaama “shaar Xasan Sheekh loogu tolanayo”.

“Waxaa hadda la leeyahay shaar (dastuurkii) Xasan Sheekh Maxamuud ayaa tolanaya, balse marka la akhriyo si qoto dheer, meelna kama muuqato in madaxweynaha si gaar ah ugu tolanayo, ama reerka ama deegaanka uu ka soo jeedo,” ayuu yiri, isaga oo intaas ku daray in ay suurtagal tahay in dadka maanta diidan ay berri iyagu dalka xukumaan.

Xildhibaanka ayaa tusaale u soo qaatay dastuurka Somaliland oo la ansixiyay sannadkii 2002, isaga oo sheegay in siyaasiyiin badan oo xilligaas diidanaa ay markii dambe xilal sare qabteen, isla markaana ay amaaneen wixii ay shalay diidanaayeen. Wuxuu intaas ku daray in waxa maanta Muqdisho ka socda ay si weyn ula mid yihiin xaaladdaas.