Jabuuti, 01 Febraayo 2026 (Dawan)— Wafdi sare oo ka socday Maraykanka ayaa Sabtidii la kulmay Madaxweynaha Jamhuuriyadda Jabuuti, Ismaaciil Cumar Geelle, si ay mar kale u xaqiijiyaan iskaashiga istiraatiijiyadeed ee labada dal, xilli weerarrada ka dhanka ah maraakiibta ku sugan Badda Cas iyo colaadaha gobolka ay sii kordhayaan, kuwaas oo halis ku ah mid ka mid ah marin-ganacsiyeedka ugu muhiimsan caalamka.
Wafdiga Maraykanka oo uu hoggaaminayay Ku-xigeenka Xoghayaha Arrimaha Dibadda, Christopher Landau, kana mid ahaa Taliyaha Taliska Maraykanka ee Afrika (AFRICOM), Jeneraal Dagvin R. M. Anderson, ayaa wada-hadallo ku saabsan la-dagaallanka argagixisada iyo amniga badda kula yeeshay Madaxweynaha Qasriga Jamhuuriyadda.
“Dagaalka lagula jiro argagixisada iyo burcad-badeedda, iyo sugidda amniga Badda Cas — oo ah marin muhiim u ah ganacsiga badda ee caalamiga ah — waa arrimo ay labada dal si dhow uga wada shaqeeyaan,” ayuu yiri Landau, isagoo la hadlay warbaahinta Dowladda Jabuuti kaddib kulanka.
Booqashadan ayaa muujinaysa muhiimadda istiraatiijiyadeed ee Jabuuti, oo martigelisa Camp Lemonnier, kaas oo ah saldhigga kaliya ee rasmiga ah ee milatariga Maraykanku ku leeyahay qaaradda Afrika.
Dalka yar ee Geeska Afrika ku yaalla ayaa noqday mid muhiim ah oo ay si dhow isha ugu hayaan quwadaha reer Galbeedka iyo kuwa gobolka, iyadoo Xuutiyiinta dalka deriska la ah ee Yemen ay sii wadaan weerarro ay adeegsanayaan diyaarado aan duuliye lahayn iyo gantaallo, kuwaas oo ay ku bartilmaameedsanayaan maraakiib maraya Badda Cas.
Jeneraal Anderson ayaa xusay in furitaanka xarunta Maryama, oo ah saldhig tababar oo wadajir ah, ay “astaan u tahay” in ka badan labaatan sano oo iskaashi milatari ah oo u dhexeeya Maraykanka iyo Jabuuti.
