Maraykanka iyo Midowga Afrika oo sameynaya Guddiga Kaabayaasha iyo Maalgelinta

Addis Ababa (Dawan) – Maraykanka iyo Midowga Afrika (AU) ayaa heshiis ku gaaray in la sameeyo guddiga kaabayaasha iyo maalgelinta si loo xoojiyo maalgelinta gaarka ah iyo xiriirka dhaqaale ee Maraykanka iyo Afrika, sida lagu sheegay war-saxaafadeed ay soo saareen labada dhinac shalay.

War-saxaafadeedka, ayaa lagu sheegay in guddiga cusub uu xooga saari doono xoojinta iskaashiga dhaqaale, abuurista shaqooyin, , iyo amniga dhaqaale ee labada dhinac, iyadoo la doonayo in laga faa’iideysto fursadaha maalgelinta ee Afrika iyo Maraykanka.

“Guddigan wuxuu saldhig u noqon doonaa iskaashiga dhaqaale ee istiraatiijiyadeed kaas oo si weyn u kobcin doona xiriirka labada dhinac muddo sanado ah,” ayaa lagu sheegay war-saxaafadeedka.

War-saxaafadeedka ayaa sidoo kale sheegay in guddiga uu noqon doono madal isku keenaysa mas’uuliyiinta Maraykanka iyo AUC (Guddoomiyaha Komishanka Midowga Afrika) si looga wada hadlo fursadaha maalgelinta gaarka ah ee Maraykanka ee ku saabsan mashaariicda iyo hindisayaasha kaabayaasha ee ay ka taageerto AU.

Guddigu wuxuu diiradda saari doonaa horumarinta silsiladaha sahayda muhiimka ah, waddooyinka gaadiidka, shabakadaha tamarta, iyo isku xirka xeerarka si loo xoojiyo kaabayaasha, iyadoo la isticmaalayo aqoonta Midowga Afrika iyo maaliyadda Maraykanka.

Heshiiskan ayaa ku soo beegmaya kadib markii Ku-xigeenka Xoghayaha Wasaaradda Arrimaha Dibadda ee Maraykanka, Christopher Landau, iyo Guddoomiyaha Komishanka Midowga Afrika, Maxamuud Cali Yuusuf , ay ku kulmeen magaalada Addis Ababa ee Itoobiya, halkaas oo ay ku adkeeyeen xiriirka Maraykanka iyo Afrika, gaar ahaan kororka dhaqaale iyo kaabayaasha muhiimka ah ee kobcinaya ganacsiga iyo nabadda.