Maxaa Jigjiga iska bedelay 10 sano kadib booqashadii Madaxweyne Xasan?

Jigjiga (Dawan)- Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta ka qeyb galay xafladda xarig-jarka mashaariic horumarineed oo dalxiis laga hirgeliyey Dowlad Deegaanka Soomaalida, gaar ahaan aagga Shabeelle, isagoo dib u xasuustay safarkiisii Jigjiga ee 2016. Madaxweynaha ayaa mashruuca Dalxiiska Shabeeley ku tilmaamay mid si qoto dheer uga tarjumaya dhaqanka, hab-nololeedka, iyo maskax furan oo ku saleysan horumar waara.

“Ma aha xoolo iyo dhismo oo kaliya, balse waa fikrad iyo aragti ka tarjumaysa hab-nololeedka ummaddan iyo deegaanka,” ayuu yiri Madaxweyne Xasan Sheekh, isagoo xusay in mashruucyadu si cad u muujinayaan dhaqanka reer guuraaga, dhaqanka geel-dhaqashada, iyo caanaha, kuwaas oo loo beddelay fursado dalxiis iyo dhaqaale.

Madaxweynaha ayaa sheegay in markii uu booqday deegaanka ku dhowaad toban sano ka hor, inuusan arag isbeddel la mid ah kan maanta muuqda, isagoo tilmaamay in horumarka kaabeyaasha dhaqaalaha uu yahay saldhigga dhabta ah ee kobaca iyo shaqo-abuurka.

Sidoo kale, Madaxweyne Xasan Sheekh ayaa bogaadiyey Maamulka Deegaanka Soomaalida, oo uu hoggaaminayo Mustafa Cumar , isaga oo xusay in horumarka ka socda deegaanku uu ka faa’iideysanayo dhammaan bulshada Geeska Afrika.

Isagoo ka hadlayay doorka ganacsiga iyo maalgashiga, Madaxweynaha ayaa muujiyey farxad uu ka qabo in dhallinyaro Soomaaliyeed oo ka kala yimid Muqdisho, deegaannada gudaha iyo dibadda inay si firfircoon uga qayb qaadanayaan maalgashiga, iyaga oo aan dareemin kala-duwanaansho ama shisheeye. “Dhaqaalaha qabiil ma laha. Soomaalidu meel kasta oo ay joogto marka ay timaado ganacsi iyo horumar, way wada shaqeeyaan, way wada nool yihiin,” ayuu yiri.

Madaxweyne Xasan Sheekh Maxamuud ayaa adkeeyey in nabaddu tahay saldhigga horumarka, isagoo sheegay in haddii aan nabad la helin, aqoon iyo maalgelin toona aysan miro dhalayn. Waxa uu ku bogaadiyey dowladda Itoobiya iyo hoggaanka Deegaanka Soomaalida juhdiga ay ku xoojinayaan nabadda, isaga oo ku baaqay in horumarka noocan ah laga hirgeliyo deegaanno kale oo Soomaalidu ku nooshahay si ay uga faa’iideystaan guud ahaan bulshada Geeska Afrika.