Maxaa sababay in Naasir Cige lagu xiro Kenya?

Nairobi (Dawan ) – Hay’adaha ammaanka ee Kenya ayaa sheegay inay xireen Naasir Cige, oo lagu eedeynayo helidda lacag si sharci-darro ah ), kaddib markii lagu qabtay Jomo Kenyatta International Airport (JKIA) ee magaalada Nairobi.

Mas’uuliyiinta ayaa sheegay in eedeysanaha lagu qabtay Terminal 1A xilli uu kasoo degayay safar caalami ah, kaddib digniin xakameyn socdaal oo la soo saaray 30-kii Janaayo 2026.

Markii ay qabteen Booliska , waxaa loo gacan geliyay qeybta dembi baarista si ay u sii amba qaadaan baaritaannada xiga ee lama huraanka u ah kiiskiisa.

Sida ay sheegeen masuuliyiintu, xilligii la qabanayay Naasir Cige wuxuu ka yimid dalka Australia, oo uu ka heysto dhalasho marka laga reebo tan Soomaaliya.

Hay’adaha ammaanka Kenya ayaa xusay in kiisku weli ku jiro marxaladda baaritaanka, isla markaana tallaabooyinka xiga ay ku xirnaan doonaan natiijada baaritaannada socda. Waxay sidoo kale carrabka ku adkeeyeen in sharcigu aanu lahayn xuduud, ayna si adag ula tacaalayaan dambiyada maaliyadeed ee ka gudba xuduudaha.

Ka hor war-saxaafadeedka booliska Kenya, Naasir Cige ayaa baraha bulshada ku baahiyay muuqaal uu isagu iska duubay, kaas oo uu ku sheegay inuu ku xiran yahay garoonka diyaaradaha ee Nairobi. Muuqaalkaas ayaa si degdeg ah ugu faafay baraha bulshada, gaar ahaan TikTok, halkaas oo uu caan ka yahay isla markaana ku leeyahay taageerayaal badan.

Xafiiska Ra’iisul Wasaaraha Soomaaliya ayaa hore si cad u beeniyay warar sheegayay in Naasir Cige uu ka shaqeeyo xafiiskaas, isagoo xaqiijiyay inuusan wax shaqo ah ku lahayn hay’adaha rasmiga ah ee dowladda.