Muqdisho (Dawan)– Khilaafaadka soo noqnoqda ee u dhaxeeya dowladda federaalka Soomaaliya iyo dowlad-goboleedyada ayaa salka ku haya arrimo dastuuri ah iyo kuwo qabiil ku dhisan, sida uu qabo Abuukaate Cumar Cabdulle Dhegey, la-taliyaha sharciga ee Ra’iisul Wasaaraha Soomaaliya,
Abuukaate Cumar oo marti ku ahaa barnaamijka Miizaan Podcast ee ka baxa Dawan Media ayaa tilmaamay in dastuurka kumeel-gaarka ah uu yahay sababta ugu weyn ee khilaafaadka, maadaama uusan qeexin awoodaha dowladda dhexe, awoodaha dowlad-goboleedyada, sida loo qeybsanayo kheyraadka, canshuuraha, iyo nidaamka maamul ee dalka.
"Marka aad fiirisid waxay isku hayan dowladda federaalka iyo xubanaheeda waa dastuurka kumeel gaarka ah oo aan dhamaystirnayn. Ma qeexayo awoodda dowladda dhexe ay leedahay mana qeexayo awoodda dowlad-goboleedyada iyo midda degmada ay leedahay . Ma qeexayo kheyraadka sida loo qeybsanayo. Ma qeexayo sida canshuuraha loo aruurinayo iyo sida loo dejinayo nidaamkeeda" ayuu yiri, Abuukaate Dhegey
Abuukaataha ayaa intaas raaciyay inu khilaafku uusan ku koobnayn dowladda federaalka Soomaaliya iyo dowlad-goboleedyada balse uu ka jiro hal dowlad goboleed dhaxdeeda ama laba dowlad goboleed isaga oo tusaale usoo qaatay khilaafaadka ka dhex aloolsan Hirshabelle, Jubbaland ama is-maandhaaf ku saleysan qaab dhismeedka iyo xuduudaha qabiilka ee Puntland iyo Waqooyi Bari.
