Jabuuti, 31 Janaayo 2026 (Dawan)– Wafdi ka socda Jamhuuriyadda Jabuuti ayaa Arbacadii ka ambabaxay caasimadda dalkaas, iyagoo ku sii jeeda ka-qaybgalka meertada 39-aad ee Bandhigga Caalamiga ah ee Farshaxanka Surajkund (Surajkund International Crafts Mela), oo ka mid ah bandhigyada farshaxanka ugu waaweyn caalamka.
Bandhiggan ayaa lagu wadaa inuu ka dhaco magaalada Surajkund, oo u dhow Faridabad, gobolka Haryana ee dalka Hindiya, inta u dhexeysa 31-ka Janaayo ilaa 15-ka Febraayo, waxaana sanad walba ka soo qayb gala farshaxanno iyo fanaaniin ka kala yimaada dalal badan, isagoo soo jiita in ka badan hal milyan oo booqde.
Bandhigga Surajkund waxa uu fursad u yahay dalalka ka-qaybgalaya inay soo bandhigaan farsamada gacanta, tolmada hidaha, muusigga iyo ciyaaraha dhaqanka, kuwaas oo ka tarjumaya kala-duwanaanshaha dhaqan ee caalamka.
Wafdiga Jabuuti ayaa ka hor dhoofitaankooda Garoonka Diyaaradaha Caalamiga ah ee Jabuuti waxaa sagootiyay Wasiirka Dhallinyarada iyo Dhaqanka, Hibo Muumin Assoweh, iyo Safiirka Hindiya u fadhiya Jabuuti, M. M. Keivom, kuwaas oo adkeeyay muhiimadda uu ka-qaybgalkaasi u leeyahay xoojinta is-dhaafsiga dhaqameed iyo xiriirka saaxiibtinimo ee labada dal.
