Maxay kawada hadleen Ra’iisul Wasaare Xamse iyo safiirka Shiinaha?

Muqdisho (Dawan) – Soomaaliya iyo Shiinaha ayaa ka wada hadlay dardargelinta iskaashiga dhinacyada amniga, dhaqaalaha iyo ganacsiga, iyada oo labada dhinac ay adkeeyeen muhiimadda ay leedahay xoojinta xiriirka taariikhiga ah ee u dhexeeya labada dal, kaddib kulan maanta dhexmaray Ra’iisul Wasaaraha Soomaaliya, Mudane Xamsa Cabdi Barre, iyo Safiirka Jamhuuriyadda Dadka Shiinaha u fadhiya Soomaaliya, Wang Yu.

Kulnaka ayaa sidoo kale diiradda lagu saaray fursadaha lagu xoojin karo wada-shaqeynta istiraatiijiga ah ee labada dal, sida lagu sheegay qoraal kasoo baxay xafiiska Ra'iisul wasaaraha.

Ra’iisul Wasaaraha ayaa sheegay in Soomaaliya ay mudnaan gaar ah siinayso xoojinta doorkeeda diblomaasiyadeed, si looga faa’iideysto danaha wadaagga ah ee kala dhaxeeya Shiinaha, gaar ahaan xilli uu dalku ku jiro marxalad dib-u-soo-kabasho amni iyo mid dhaqaale.

Dhankiisa, Safiir Wang Yu ayaa muujiyay sida ay Dowladda Jamhuuriyadda Dadka Shiinaha uga go’an tahay sii wadista iyo ballaarinta xiriirka saaxiibtinimo ee ay la leedahay Soomaaliya, isaga oo xusay in Shiinaha uu sii xoojin doono taageerada uu siiyo Soomaaliya ee dhinacyada amniga, maalgashiga, iyo horumarinta dhaqaalaha.

Ra’iisul Wasaare Xamsa Cabdi Barre ayaa uga mahadceliyay Dowladda Shiinaha doorka ay ka qaadato taageerada midnimada, madax-bannaanida iyo wadajirka dhuleed ee Soomaaliya, isaga oo sidoo kale tilmaamay kaalinta muuqata ee Shiinaha ku leeyahay dib-u-dhiska kaabayaasha dhaqaalaha iyo bixinta gargaarka bini’aadantinimo.

Kulankan ayaa imaanaya xilli Soomaaliya ay xoojinayso iskaashiga caalamiga ah si loo taageero dadaallada lagu xaqiijinayo amniga, kobaca dhaqaalaha, iyo ballaarinta ganacsiga, iyadoo Shiinaha uu kamid yahay saaxiibada istiraatiijiga ah ee ay wadaagaan xiriir soo jireen ah.