Maxay Qaramada Midoobay ka dhahday dib u dhaca wufuudda Puntland iyo Jubaland?

Muqdisho (Dawan)— Howlgalka Kaalmada Ku Meel Gaarka ah ee Qaramada Midoobay ee Soomaaliya (UNTMIS) ayaa Axaddii sheegay iniu ka xunyahay in kooxaha hordhaca ah ee ka socday Puntland iyo Jubaland aysan u suurtagelin inay soo gaaraan madasha wadatashiga qaranka ee la qorsheeyay inay ka furanto Muqdisho.

UNTMIS waxay sheegtay in sababta dib-u-dhaca ay ahayd inaan la bixin oggolaanshihii farsamo ee lagama maarmaanka ahaa.

War-saxaafadeed caawa ay soo saartay UNTMIS ayaa si xooggan ugu dhiirrigelisay dhammaan dhinacyada inay mudnaanta siiyaan qaab-dhismeedka hore loogu heshiiyey ee wada-tashiga, si loo gaaro is-afgarad ku saabsan doorashooyinka iyo arrimaha kale ee muhiimka u ah qaranka ka hor dhammaadka muddada waajibaadka dastuuriga ah.

Sidoo kale, UNTMIS waxay ku boorrisay in si degdeg ah loo dhamaystiro shaqada diyaarinta ee ay wadaan kooxaha farsamada, iyadoo ku dhiirrigelisay Dowladda Federaalka Soomaaliya iyo hoggaanka Golaha Mustaqbalka Soomaaliyeed inay sameeyaan dadaal dheeri ah oo lagu abuuro jawi ku habboon wada-hadal wax-ku-ool ah, si loo gaaro heshiis dhammaan dhinacyadu ku qanacsan yihiin.

Wada-hadalada siyaasadeed ee u dhexeeya hoggaamiyeyaasha Federaalka iyo dowlad-goboleedyada ayaa loo arkaa kuwo muhiim ah, si loo horumariyo qaababka doorashada loona yareeyo xiisadaha ka hor inta aan la gaarin go'aannada siyaasadeed ee muhiimka ah.