Muqdisho (Dawan )– Shirweynaha 27-aad ee Iskaashiga Geeska Afrika ayaa maanta ka furmaya magaalada Muqdisho, caasimadda Soomaaliya. Shirkan oo diiradda lagu saarayo arrimaha muhiimka ah ee la xiriira helitaanka tamarta iyo ganacsiga gobolka, waxaa si wadajir ah u guddoominaya Wasiirka Maaliyadda Soomaaliya, Mudane Biixi Iimaan Cige, iyo Ku-xigeenka Agaasimaha Guud ee Guddiga Iskaashiga Caalamiga ah ee Midowga Yurub, Marwo Myriam Ferran.
Ujeeddada shirweynahan ayaa ah in la qiimeeyo horumarka laga gaaray qodobbadii lagu heshiiyay shirarkii hore ee sannadihii 2021, 2022 iyo 2024, iyo sidoo kale in dib loo eego dadaallada socda ee lagu taageerayo helitaanka tamarta gobolka. Qodobbada muhiimka ah ee laga doodayo waxaa ka mid ah ganacsiga tamarta, ballaarinta helitaanka tamarta meelaha fogfog, iyo dardar-gelinta tallaabooyinka siyaasadeed ee lagu xaqiijinayo horumarinta tamarta waarta.
Shirka waxaa ka qeybgalaya wasiirro iyo mas’uuliyiin sare oo ka kala socda dalalka Geeska Afrika, oo ay ka mid yihiin Itoobiya, Kenya, Jabuuti iyo Koonfur Suudaan, iyadoo sidoo kale ay goob joog yihiin wakiillo ka socda hay’adaha caalamiga ah ee ay ka mid yihiin Bankiga Adduunka, Bankiga Horumarinta Afrika, iyo Barta Tamarta Bariga Afrika. Ka-qeybgalayaal aan si toos ah u imaan karin ayaa iyaguna shirka uga qeyb qaadanaya hab online ah.
