Muxuu Cirro kala soo laabtay Davos?

Hargeysa, 24 Janaayo 2026 (Dawan)– Madaxweynaha Somaliland, Cabdiraxmaan Maxamed Cabdillaahi (Cirro), ayaa ku soo laabtay Hargeysa kaddib safar dibadeed oo qarsoodi ah, kaas oo markii dambe la ogaaday inuu ku tegay magaalada Davos ee dalka Switzerland, halkaas oo uu kaga qayb galay Shirka Madasha Dhaqaalaha Adduunka (World Economic Forum – WEF), sida ay xaqiijiyeen ilo rasmi ah.

Ujeedada loo qariyay safarka madaxweynaha ayaa hadal-hayn xooggan ka dhalisay baraha bulshada, inkasta oo uu markii dambe Cirro soo dhigay sawirro barahiisa bulshda, isaga oo aan sheegin halka uu joogo iyo ajandaha safarkiisa.

Falanqeeyayaalka siyaasadda iyo dadka isticmaala baraha bulshada ayaa su’aal geliyay sababta loo qariyay socdaalka iyo ujeedadiisa dhabta ah.

Intii uu ku sugnaa Davos, Cirro wuxuu kulan la yeeshay Madaxweynaha Israa’iil iyo wiilka Trump taas oo dhalisay aragtiyo kala duwan. Dadka qaar ayaa taageero u muujiyay tallaabada uu qaaday Cirro ee ku raadinayo xulufo siyaasadeed halka qaar kale ay ku dhaliileen inuu aqoonsiga Somaliland usoo maro maamul dunida ka takooran.

Cirro ayaa ayaa sidoo kale halkaas ka sheegay in Somaliland ay qorsheynayo inay ku biirto heshiiska Abraham Accords, oo salka ku haya sida uu sheegay wada-hadal iyo is-faham, isla markaana Somaliland ay taageersan tahay dadaalladaas nabadeed iyo iskaashiga gobolka.

Soo laabashadiisa Cirro ee Hargeysa ayaa ka duwaneed jawigi uu ku baxay, waxaana lagu soo dhaweeyay qaab maamuls leh, iyada oo ay soo xaadireen garoonka Madaxweyne Ku xigeenka Somaliland iyo mas’uuliyiin kale, taas oo muujinaysa muhiimadda safarka iyo doorka uu ka ciyaari karo qorshayaasha Somaliland ee xiriirka caalamiga ah.

Safarkan ayaa tilmaamaya sida Somaliland ay u raadineyso in ay ka qayb qaadato fursadaha diblomaasiyadeed iyo ganacsi ee caalamiga ah, gaar ahaan iyada oo dhanka siyaasadda iyo amniga u adeegsanaysa heshiisyada nabadeed ee gobolka.