Soomaaliya (Dawan) – Madaxweynaha Soomaaliya Xasan Sheekh Maxamuud ayaa faahfaahin ka bixiyay go’aanka dowladda Soomaaliya ay ku joojisay iskaashigii amniga, difaaca iyo dhaqaalaha ee Imaaraadka Carabta (UAE), isaga oo sheegay in arrintaasi ay ka dhalatay walaac la xiriira suurtagalnimada in dalka mar kale u gacan galo kala-qaybsanaan.
Madaxweynaha oo wareysi siiyay Al Jazeera English maanta, ayaa sheegay in dowladda Soomaaliya ay muddo dheer ku dadaalaysay in caalamka ula macaamilo hab mideysan, isaga oo Imaaraadka Carabta ka codsaday in ay Soomaaliya ula dhaqmanto sidii hal dal oo qaran ah, halkii ay ula macaamili laheed gobollo iyo maamullo kala duwan.
“Waxaan ka codsanay in Soomaaliya loola macaamilo sidii dal mideysan, balse way ku adkaatay arrintaas, taas ayaana keentay in aan ka baxno heshiisyadii jiray,” ayuu yiri Madaxweynaha.
Madaxweynaha ayaa intaas ku daray in inkasta oo wadahadallo badan ay la yeesheen Imaaraadka, haddana aysan suurtagal ahayn in la sii wado taageero kasta oo ay dowladda u aragto mid wax u dhimaysa midnimada dalka. “Ma aqbaleyno cid taageerta kala-qaybsanaanta Soomaaliya ama sii xoojinta khilaafaadka gudaha,” ayuu caddeeyay Madaxweynaha, isaga oo xusay in dalka uu horay ula tacaalayay kala-qaybsanaan.
