Puntland iyo Jubaland oo ku eedeeyay Dowladda inay halis gelisay ilaalada madaxdooda

Muqdisho, 1 Febraayo 2026 (Dawan) — Dowlad-goboleedyada Puntland iyo Jubaland ayaa maanta oo Axad ah ku eedeeyay Dowladda Federaalka Soomaaliya inay khatar gelisay nolosha saraakiil, kadib markii laba diyaaradood oo siday ilaalada madaxweynayaashooda laga celiyey hawada, iyagoo ku sii jeeday Muqdisho.

Labada maamul ayaa bayaanno kala duwan ku sheegay in tallaabada ay qaaday dowladda federaalka ay ahayd mid siyaasadaysan, isla markaana jebisay heshiisyo hore loo galay.

War-saxaafadeed ka soo baxay Puntland ayaa lagu sheegay in wafdigoodu uu ku sii jeeday Muqdisho si uu uga qayb galo shir u dhexeeya Dowladda Federaalka iyo Golaha Mustaqbalka, kaas oo hore loogu balamay. Puntland waxay cambaareysay tallaabada lagu joojiyay diyaaradaha, iyadoo sheegtay in ay khatar ku ahayd nolosha saraakiil iyo askar ka tirsan ilaalada Madaxweynaha Puntland.

“Dowladda Puntland waxay si adag u cambaareyneysaa in Madaxda Dowladda Federaalka ay khatar geliyeen nolosha saraakiil iyo ciidamo ka tirsan ilaalada Madaxweynaha Puntland,” ayaa lagu yiri bayaanka, iyadoo falkaas lagu tilmaamay mid si toos ah u halis gelinaya wafdigooda.

Dhanka Jubaland, Wasiirka Warfaafinta Jubaland, Cabdifataax Maxamed Mukhtaar, ayaa beeniyay eedeymaha dowladda federaalka ee ahaa in Jubaland iyo Puntland ay jebiyeen habraacyadii lagu heshiiyay, gaar ahaan kuwa la xiriira tirada ilaalada iyo gudbinta liiska rakaabka.

“Sheegashada ah in Jubaland iyo Puntland ay ka baxeen heshiis la xiriira tirada ilaalada madaxweynayaasha waa mid gebi ahaanba aan sal iyo raad toona lahayn,” ayuu yiri wasiirku.

Jawaabta Puntland iyo Jubaland ayaa timid kadib markii subaxnimadii Axadda Dowladda Federaalka Soomaaliya ay hawada ka celisay laba diyaaradood oo siday ilaalada madaxweynayaasha Jubaland iyo Puntland, kuwaas oo ku soo wajahnaa Muqdisho.

Ilo ka tirsan dowladda federaalka ayaa u xaqiijiyay Dawan in diyaaradahaasi ay jebiyeen habraacyadii la isku raacay, kuwaas oo xaddidayay tirada ilaalada wafdiga ilaa 40 qof, isla markaana aan horay loo soo gudbin liiska rakaabka iyo qalabka ay wateen.

Dhacdadan ayaa imanaysa xilli la filayay in maanta uu furmo shir muddo dheer la sugayay oo u dhexeeya Dowladda Federaalka Soomaaliya iyo Golaha Mustaqbalka Soomaaliya, kaas oo lagu qorsheeyay inuu ka dhaco magaalada Muqdisho.