Puntland (Dawan) – Guddiga u qaabilsan gurmadka abaaraha ee Puntland oo shir uu gudoomiyay Madaxweyne Ku xigeenka Puntland ayaa ka warbixiyay saameynta ba’an ee abaartu ku yeelatay dadka iyo duunyada, iyaga ugu baaqay shacabka gudaha iyo dibadda in ay ka qayb qaataan taakuleyn degdeg ah.
Shirka oo ay ka soo qeyb galeen xubnaha guddiga, ayaa lagu sheegay in abaaruhu saameeyeen in ka badan 1.2 milyan oo qof, isla markaana ay ku fidsan yihiin dhammaan gobollada Puntland, iyadoo afar xilli oo isku xiga ay roobabku yaraayeen ama gabi ahaanba baaqdeen.
Wasiirka Gargaarka Ubax Cabdirashiid Maxamed Xirsi, ayaa sheegtay in ajendaha kulanka uu ahaa qiimeynta xaaladda abaarta iyo dardargelinta gurmadka. waxay xustay in maamulka, iyagoo kaashanaysa hay’adaha bahwadaagta ah, ay hore u fulisay tallaabooyin ay ka mid yihiin: Daaweynta 316,000 neef oo xoolo ah, dayactirka 103 ceel-biyood si loo hubiyo helitaanka biyo nadiif ah iyo Gaarsiinta gargaar isugu jira cunno iyo biyo deegaanno badan
“Waxaan u dhanahay dhamaanteen oo seddexda guddi ah sidi aan gurmadka u sii xoojin lahayn oo dadka abaarta saameysay wax loogu qaban lahaa,” ayay tiri wasiiradda, iyadoo xustay in faahfaahin dheeraad ah lala wadaagi doono warbaahinta marka ay shaqooyinka socda dhammaadaan.
