Soomaaliya, 3-da Febraayo 2026 (Dawan)— Maamulka Puntland ayaa subaxnimadii maanta ku fuliyay xukun dil Hodan Maxamuud Diiriye, oo 34 jir ah, kaddib markii lagu helay dilka Sabirin Saylaan Cabdille.
Wariyeyaal ku sugan magaalada Gaalkacyo iyo qareennadii u doodayay kiiska ayaa xaqiijiyay in xukunka la fuliyay subaxnimadii maanta. Fulinta xukunka ayaa ku timid amar rasmi ah oo ka soo baxay Maxkamadda Sare ee Puntland, sida ku cad qoraal ay heshay Dawan Media.
Maxkamadda Degmada Gaalkacyo ayaa bishii Diseembar 2025 horey u ridday xukunka, inkastoo racfaan u furnaa eedeysanaha, hase yeeshee aan la qaadan. Kadib, Maxkamadda Sare ee Puntland ayaa xukunka si rasmi ah u xaqiijisay, kaddib codsi ka yimid Xeer Ilaaliyaha Guud ee Puntland. Qoraal rasmi ah oo ka soo baxay maxkamadda, kuna taariikhaysan 3-da Janaayo 2026, ayaa lagu sheegay in la amray fulinta xukunka dilka, iyadoo la tixraacayo qodobada sharciga ee khuseeya, islamarkaana la cayimay waqtiga iyo goobta fulinta xukunka.
