Kenya (Dawan) – Dowladaha Kenya iyo Maraykanka ayaa si rasmi ah u bilaabay hirgelinta mashruuc ballaaran oo lagu casriyeynayo laguna ballaarinayo saldhigga milatari ee Manda Bay ee ku yaalla gobolka xeebta ah ee Lamu, tallaabo lagu doonayo in saldhiggaasi loogu beddelo xarun amni oo istiraatiiji ah oo heer gobol ah, isla markaana lagu xoojiyo awoodda labada dal ee ka hortagga caqabadaha amni ee Bariga Afrika.
Maalgelinta mashruucan ayaa lagu qiyaasay ku dhowaad 9 bilyan oo shilinka Kenya ah (qiyaastii 70 milyan oo doollar), waxaana ka mid ah dhismaha waddada diyaaradaha oo dhererkeedu dhan yahay 10,000 oo tallaabo, taas oo ay kasoo degi karaan diyaaradaha xamuulka culus iyo kuwa dagaalka casriga ah, iyo sidoo kale horumarinta kaabeyaasha saadka iyo tiknoolajiyadda ee saldhigga.
Wasiirka Gaashaandhigga Kenya, Marwo Soipan Tuya, ayaa sheegtay in mashruucu “ka waynyahay dhismaha xarun milatari ”, iyadoo ku tilmaantay “farriin istiraatiiji ah oo muujinaysa go’aanka Kenya ee ilaalinta amnigeeda iyo kan gobolka, xilli ay sii kordhayan isbeddellada dhanka amiga”. Waxay intaas ku dartay in ballaarintu ujeedkeedu yahay hubinta diyaar-garow degdeg ah iyo in laga hortago dib-u-dhaca ama daldaloolo amni oo hore uga jiray saldhigga.
Dhankiisa, Ku-xigeenka Wasiirka Arrimaha Dibadda ee Maraykanka, Christopher Landau, ayaa sheegay in mashruucu caddeyn u yahay iskaashiga Kenya iyo Maraykanka, isla markaana uu sare u qaadayo awoodda lagu jawaabayo xaaladaha degdegga ah ee bani’aadantinimo iyo amni ee Bariga Afrika iyo guud ahaan Geeska Afrika.
