Soomaaliya, 6 Febraayo 2026 (Dawan) – Isbahaysiga mucaaradka ee Golaha Mustaqbalka Soomaaliya, ayaa muujiyay walaac weyn oo ku saabsan dagaal labo maalmood ka socday Baydhabo, oo ah caasimadda ku meel gaarka ah ee dowlad goboleedka Koonfur Galbeed, iyagoo sheegay in rabshadahaasi ay khatar ku yihiin shacabka, burburinayaan hantida dadweynaha, isla markaana ay wiiqayaan kalsoonida lagu qabo hay'adaha dowladda.
Sida uu sheegay Goluhu, muddo xileedka rasmiga ah ee dowlad goboleedka Koonfur Galbeed ayaa dhacay, taasoo maamulka gelisay firaaq sharci iyo mid siyaasadeed, oo ku xiran dowladda federaalka ah.
"Habka kaliya ee dowlad goboleedka Koonfur Galbeed uu uga gudbi karto hubanti la'aanta sharciga ah iyo nuglaanta siyaasadeed waa iyadoo la maro doorashooyin loo dhan yahay, hufan, oo lagu heshiiyey," ayuu Goluhu ku yiri war qoraal ah oo xalay oo Khamiis ah uu soo saary.
Golaha ayaa sidoo kale dhaleeceeyay dowladda federaalka ah oo ay ku eedeeyeen inay dayacday waajibaadkeeda dastuuriga ah ee ah ilaalinta kala dambeynta iyo u hoggaansanaanta sharciga, iyagoo iftiimiyay waxa ay ku tilmaameen aamusnaanta dowladda intii ay socdeen shaqaaqooyinka.
