Soomaaliya iyo saaxiibada caalamiga ah oo ka wada hadlay xoojinta amniga

Muqdisho (Dawan) – Mas’uuliyiin sarsare oo ka tirsan Midowga Afrika, Qaramada Midoobay, iyo Dowladda Federaalka Soomaaliya ayaa Arbacadii ku kulmay Muqdisho si ay uga wada hadlaan amniga qaranka iyo iyo iskaashiga u dhexeeya , sida lagu sheegay bayaan ay soo saartay AUSSOM.

Kulanka saddex-geesoodka ah oo ka dhacay madaxtooyada Villa Somalia waxaa ka qaybgalay Safiir El Hadji Ibrahima Diene, madaxa Howlgalka Taageerada iyo Xasilinta ee Midowga Afrika ee Soomaaliya (AUSSOM); James Swan, Ergeyga Gaarka ah ee Qaramada Midoobay; La-taliyaha Amniga Qaranka Soomaaliya Aweys Xaaji Yuusuf Axmed; iyo Qurat-ul-Ain Sadozai, madaxa Xafiiska Taageerada Qaramada Midoobay ee Soomaaliya (UNSOS).

Sida lagu sheegay bayaan ka soo baxay AUSSOM, wadahadallada ayaa diiradda lagu saaray iskaashiga istaraatiijiyadeed ee ka dhexeeya hay’adaha caalamiga ah iyo Dowladda Federaalka Soomaaliya, iyadoo qodobadii ka soo baxay kulanka aan weli la shaacin.

Safiir Diene ayaa dib u xaqiijiyay ballanqaadka AUSSOM ee ku aaddan taageerada dadaallada ay Soomaalidu hogaanka ka hayso si loo gaaro nabad iyo xasillooni waarta.

Kulankan ayaa ku soo beegmaya xilli Soomaaliya ay ku jirto xaalad amni oo isbeddelaysa, isla markaana ay qaadanayso door diblomaasiyadeed oo muuqda. Toddobadkii hore, Soomaaliya ayaa xaqiijisay guul taariikhi ah iyada oo xubin ka noqotay Golaha Nabadda iyo Amniga ee Midowga Afrika muddada 2026–2028.

Sidoo kale, Midowga Afrika ayaa ku dhawaaqay inuu isugu yeeri doono kulan ay yeelanayaan dalalka ciidamada ku deeqay si looga wadahadlo mustaqbalka howlgalka AUSSOM iyo xaqiijinta in aanu dhalan daldaloolo amni xilliga kala-guurka.