Soomaaliya iyo Sacuudiga oo heshiis ku gaarey horumarinta Imaamyada Masaajida

Jeddah (Dawan) – Jamhuuriyadda Federaalka Soomaaliya iyo Boqortooyada Sacuudi Carabiya ayaa heshiis ku gaaray horumarinta arrimaha Islaamka, gaar ahaan tababaridda iyo xoojinta awoodda imaamyada iyo khadiibyada masaajidda.

Heshiiskan ayaa waxaa labada dhinac u kala saxiixay Wasiirka Wasaaradda Awqaafta iyo Arrimaha Islaamka ee Soomaaliya, Sheekh Mukhtaar Roobow Cali, iyo Wasiirka Arrimaha Islaamka, Dacwada iyo Hanuuninta ee Sacuudi Carabiya, Dr. Cabdulladiif bin Cabdulcasiis Aal Sheekh, waxaana saxiixu ka dhacay magaalada Jeddah.

Heshiiska, oo socon doona muddo saddex sano ah (2026–2028), ayaa diiradda saaraya xoojinta iskaashiga labada dal ee ku aaddan horumarinta arrimaha Awqaafta, iyo tayeynta imaamyada iyo khadiibyada masaajidda. Waxa uu sidoo kale qorsheynayaa in la bixiyo tababarro gaar ah oo lagu xoojinayo aqoonta diineed, laguna barayo ka hortagga afkaaraha xagjirnimada, ka qaybgalka aqoon-isweydaarsiyada Islaamka, shirarka caalamiga ah, iyo tartamada xifdinta Qur’aanka Kariimka.

Wasiirka Wasaaradda Awqaafta iyo Arrimaha Islaamka ee Soomaaliya, Sheekh Mukhtaar Roobow Cali, ayaa sheegay in heshiiskani yahay mid muhiim u ah horumarinta arrimaha Islaamka ee dalka, isagoo uga mahadceliyay dowladda Sacuudi Carabiya taageerada joogtada ah ee ay la garab taagan tahay Soomaaliya.

Dhankiisa, Wasiirka Arrimaha Islaamka ee Sacuudi Carabiya, Dr. Cabdulladiif bin Cabdulcasiis Aal Sheekh, ayaa xusay in iskaashigan uu gacan ka geysanayo kor u qaadista aqoonta iyo xirfadaha imaamyada iyo khadiibyada, si ay bulshada ugu gudbiyaan faham diimeed oo sax ah, kuna dhisan dhexdhexaadnimo iyo is-faham.

Heshiiskan ayaa sidoo kale xoogga saaraya la-dagaallanka xagjirnimada iyo abuurista fursado ay imaamyada iyo khadiibyada ku horumarin karaan aqoontooda diineed, taas oo ka qayb qaadan doonta kor u qaadista wacyiga bulshada iyo xasilloonida diimeed ee Jamhuuriyadda Federaalka Soomaaliya.