Muqdisho, 6 Febraayo 2026 (Dawan)– Dowladda Federaalka Soomaaliya ayaa caawa oo Jimce ah muujisay garab istaaggeeda Pakistan ka dib markii qarax dhimasho geystay uu ka dhacay meel u dhow masjid ku yaal duleedka Islamabad, kaas oo ay ku dhinteen ugu yaraan 31 qof, kuna dhaawacmeen in ka badan 160 qof oo kale, sida ay sheegeen mas’uuliyiinta Pakistan.
War qoraal ah oo ka soo baxay Wasaaradda Arrimaha Dibadda Soomaaliya ayaa lagu sheegay in qaraxa uu dhacay xilligii salaadda Jimcaha, meel u dhow Masaajidka Imaam Baargah ee deegaanka Tarlai ee magaalada Shehzad, iyadoo falkaasi lagu tilmaamay weerar ka dhan ah rayidka iyo goob cibaado.
“Dowladda Federaalka Soomaaliya waxay tacsi tiiraanyo leh u direysaa qoysaska dhibanayaasha, waxayna u rajeyneysaa bogsi degdeg ah oo buuxda kuwa dhaawacmay,” ayaa lagu yiri bayaanka, iyadoo sidoo kale si adag loogu cambaareeyay dhammaan falalka rabshadaha ah ee lala beegsanayo rayidka iyo goobaha diinta.
