Muqdisho (Dawan) – Wasaaradda Qorsheynta iyo Maalgashiga ayaa shalay qabatay shir ay ka soo qeyb galeen ilaa sideed wasaaradood oo ka tirsan dowladda iyo Hay’adda Maareynta Masiibooyinka Qaranka (SODMA), si wax looga qabto dhibaatooyinka cunto-yarida iyo nafaqo-xumida ee dalka ka taagan, kuwaas oo sii xumaaday kaddib abaaro daba dheeraaday.
Shirku wuxuu diiradda saaray qorshayaasha looga hortagayo saameynta cunto-yarida iyo nafaqo-xumida ee ku habsatay bulshada Soomaaliyeed, kuwaas oo saameyn ku yeeshay malaayiin qof, gaar ahaan dadka nugul ee ku nool gobollada ay abaaruhu sida weyn u saameeyeen.
Wasiirka Qorsheynta iyo Maalgashiga, Mudane Maxamuud Cabdiraxmaan Beebene, ayaa carabka ku adkeeyay in dowladda ay diyaarinayso qorshe wada-shaqeyn ah oo ay ka qeyb qaadanayaan wasaaradaha dowladda iyo hay’adaha caalamiga ah, si gargaar loo gaarsiiyo dadka u baahan. “Sanadkii hore Soomaaliya waxay la kulantay abaaro daran, waxaana hadda muuqda in malaayiin qof, gaar ahaan barakacayaasha, ay la daalaa-dhacayaan cunto-yari iyo nafaqo-darro,” ayuu yiri Wasiir Beebene.
Wasiirku wuxuu xusay in dowladda ay ka go’an tahay xoojinta iskaashiga ay la leedahay ururrada caalamiga ah, si loo yareeyo saameynta abaaraha. “Waa inaan hubinno in xalal degdeg ah la helo, isla markaana la abuuro qorshayaal waqti-dheer ah oo lagu dhisayo adkeysiga mustaqbalka,” ayuu hadalkiisa ku daray.
Shirku sidoo kale wuxuu muujiyay muhiimadda ay leedahay xoojinta wada-shaqeynta u dhaxeysa wasaaradaha dowladda, hay’adaha caalamiga ah, iyo ururrada samafalka, si caawimaaddu u gaarto dadka ugu baahan.
