Soomaaliya oo shatiyadii ugu horreeyay siisay shirkadaha caymiska Islaamiga

Muqdisho (Dawan)- Bankiga Dhexe ee Soomaaliya ayaa maanta oo Talaadado ah si rasmi ah u shaaciyay in uu bixiyay shatiyadii ugu horreeyay ee shirkadaha bixiya adeegga caymiska Islaamiga ah ee Takaful, kaddib ansixintii Sharciga Caymiska Takaful bishii Maajo 2025, tallaabadaas oo lagu tilmaamay mid muhiim u ah nidaaminta iyo casriyeynta sector-ka caymiska dalka.

Bankiga ayaa bayaan uu soo saaray ku sheegay in afar shirkadood oo buuxiyay shuruudihii sharci iyo farsamo ee loo dejiyay ruqsad-siinta lagu wareejiyay shatiyo rasmi ah. Shirkadahaas ayaa kala ah: First Somali Takaful Insurance LTD, Amanah Insurance LTD, Baraka Takaful Insurance LTD, iyo Salmastar Insurance.

"Guddiga Sare ee Maamulka Bankiga Dhexe ayaa kulankiisii caadiga ahaa ee qabsoomay 24ka Janaayo 2026, waxa uu ku ansixiyay codsiyada shati-siinta afar (4) shirkadood oo buuxiyey shuruudaha ruqsad-siinta adeegga caymiska" ayaa lagu yiri, bayaan kasoo baxay Bankiga

Bayaanka ayaa lagu sheegay in tallaabadan ay ujeedadeedu tahay xoojinta kormeerka iyo nidaaminta adeegga Takaful, hubinta in uu waafaqsan yahay mabaadi’da Shareecada Islaamka, hirgelinta hannaan casri ah oo lagu maareeyo khataraha, iyo ballaarinta helitaanka adeegyo caymis oo hal-abuurnimo leh, si kor loogu qaado kalsoonida macaamiisha iyo maalgashadayaasha.

Guddoomiyaha Bangiga Dhexe ee Soomaaliya, Cabdiraxmaan Maxamed Cabdullaahi, ayaa sheegay in shatiyadan ay dhidib u taagayaan xasilloonida nidaamka maaliyadeed ee dalka. “Rukhsad-siintani waa tallaabo aasaasi ah oo dhidib u taagaysa nidaamka maaliyadeed ee Soomaaliya. Waxay lagama-maarmaan u tahay kormeerka shirkadaha caymiska iyo maareynta khataraha maaliyadeed ee la xiriira adeeggan.” ayuu yiri.

Soomaaliya ayaa muddooyinkii dambe ku howlaneyd dib-u-habeyn ballaaran oo lagu sameynayo kaabayaasha maaliyadeed iyo xoojinta sharciyeynta qaybta maaliyadda, iyadoo la doonayo in la dhiso nidaam hufan oo waara. Hirgelinta caymiska Takaful ayaa la filayaa inay kordhiso ka-qaybgalka maaliyadeed, isla markaana ay bixiso adeegyo la jaan qaadaya baahiyaha bulshada ka jira dalka.

Bankiga Dhexe ayaa sidoo kale adkeeyay in uu sii wadi doono dadaallada lagu horumarinayo lana ilaalinayo xasilloonida maaliyadeed ee qeybtan, si loo xaqiijiyo koror dhaqaale oo waara iyo kalsooni guud oo ku aaddan adeegyada maaliyadeed.