Soomaaliya oo xaqiijisay in aan laga cabsi qabin isku dhaca dalalka xubnaha ka ah AUSSOM

Muqdisho (Dawan) — Wasiirka Arrimaha Dibadda Soomaaliya, Cabdisalaan Cabdi Cali Dhaay, ayaa sheegay inaysan jirin wax iska hor imaad ah oo ka dhex imaan kara ciidamada kala duwan ee ka tirsan howlgalka AUSSOM, isagoo ku adkeystay in howlgalkan ku shaqeynayo hannaan mideysan oo hoos yimaada Midowga Afrika.

Wasiirka ayaa hadalkan ka sheegay barnaamijka Miizaan Podcast ee Dawan Media, isagoo sharaxay in howlgalka AUSSOM uu yahay hal howlgal oo leh hoggaan, waajibaad (mandate), iyo habraac cad oo ay dejisay Midowga Afrika.

“Howlgalka waxaa hoggaaminaya Midowga Afrika, wuxuuna leeyahay mandate iyo nidaam la raaco. Ma aha ciidamo kala madax-bannaan oo mid walba si gooni ah u shaqeynaya,” ayuu yiri Wasiirku.

Wasiirka Arrimaha Dibadda ayaa xusay in dhammaan ciidamada ku sugan Soomaaliya ee ka tirsan AUSSOM ay ka yimaadeen dalal Afrikaan ah, isla markaana ay wadaagaan mabaadi’da, shuruucda, iyo go’aannada Midowga Afrika, taas oo meesha ka saaraysa suurtagalnimada isku dhac dhexmara ciidamadaasi.

Sidoo kale, Wasiirku wuxuu sheegay in Dowladda Federaalka Soomaaliya ay soo dhoweysay dal kasta oo Afrikaan ah oo ka qayb qaadanaya howlgalka, isagoo tusaale u soo qaatay taageerada iyo ka qaybgalka dowladda Masar.

“Ma jiro dal reer Yurub ah ama ciidan aan Afrikaan ahayn oo qayb ka ah howlgalka. Dhammaan dalalka ka tirsan waa dalal Afrikaan ah, waxaana howlgalka lagu wadaa in uu ku shaqeeyo mabaadi’da Midowga Afrika,” ayuu yiri.

Hadalka Wasiirka ayaa kusoo beegmaya iyada oo ay Masar soo bandhigtay dhawaan ciidamada ay usoo diri doonto Soomaaliya si ay qeyb uga noqdaan howlgalka AUSSOM ee taageerada xasiloniida Soomaaliya. Arrintan ayaa dhalisay doodo badan maadama ay jirto xurguf siyaasadeed oo u dhaxeysa wadamada Masar iyo Itoobiya taas oo laga cabsi qabo inay saamayn ku yeelato baadi goobka xasiloonida Soomaalida.

Howlgalka AUSSOM ayaa beddelay qaabkii hore ee hawlgallada amniga ee Soomaaliya, waxaana dowladda federaalku ay sheegtay in ujeeddadiisu tahay xasillinta dalka, taageeridda hay’adaha amniga Soomaaliya, iyo xaqiijinta kala-guur amni oo nidaamsan, iyadoo la raacayo go’aannada Midowga Afrika iyo wada-shaqeyn buuxda oo dhex marta dhammaan ciidamada ka qayb qaadanaya.