Turkiga oo maraakiib dagaal usoo diray Soomaaliya

Ankara (Dawan)- Dhowr markab oo nuuca dagaalka ah oo ay leeyihiin Ciidanka Badda Turkiga ayaa la filayaa inay soo gaaraan Soomaaliya 11-ka Febraayo, si ay u sugaan amniga hawlgallada baarista shidaalka ee badda, isla markaana ay u bixiyaan taageero dhinaca saadka ah, sida ay Khamiistii ku dhawaaqday Wasaaradda Gaashaandhigga Turkiga.

Tallaabadan ayaa daba socota kadib markii Baarlamaanka Turkiga uu cod aqlabiyad leh ku ansixiyay kordhinta muddada hawlgalka ciidanka badda Turkiga ee ku sugan xeebaha Soomaaliya.

Maraakiibta ayaa gaaraya saddex markab, kuwaas oo kala ah TCG Gökova, TCG Bafra, iyo markabka xambaara ciidanka ee TCG Sancaktar.

Maraakiibtan ayaa loo xilsaaray difaaca markabka qodista shidaalka ee Çağrı Bey, kaas oo hadda ka wada baaritaanno iyo cilmi-baaris dhinaca shidaalka ah aagga badda ee Soomaaliya.

Afhayeenka Wasaaradda Gaashaandhigga Turkiga, Zeki Aktürk, ayaa sheegay in hawlgalkan uu taageeri doono Taliska Hawlgalka Wadajirka ah ee Soomaaliya iyo Turkiga inta lagu guda jiro hawlgallada ka socda Gacanka Cadmeed, Badda Carabta, iyo xeebaha Soomaaliya, ilaa 25-ka Febraayo.

“Si loo bixiyo taageero dhinaca saadka ah oo loo fidiyo Taliska Hawlgalka Wadajirka ah ee Soomaaliya iyo Turkiga, isla markaana loo sugo amniga markabka qodista ee Çağrı Bey, ciidammada badda Turkiga waxay hawlgallo ka fulin doonaan Gacanka Cadmeed, xeebaha Soomaaliya, iyo Badda Carabta,” ayuu Aktürk ka sheegay shir jaraa’id oo toddobaadle ah oo ka dhacay magaalada Ankara.

Hawlgalkan ayaa imanaya iyadoo Baarlamaanka Turkigu 11-kii Janaayo ansixiyay soo jeedin madaxweyne oo lagu kordhinayo hawlgalka ciidanka badda Turkiga ee gobolka muddo sannad dheeri ah. Kordhintaas, oo ay aqlabiyad ku meel mariyeen xubnaha Golaha Qaranka Turkiga, ayaa dhaqan geli doonta 10-ka Febraayo, taas oo xaqiijinaysa joogitaanka joogtada ah ee Turkiga ee biyaha Soomaaliya iyo marinada istiraatiijiga ah ee ku xeeran.

Sida qorshuhu yahay, maraakiibta ayaa booqasho dekedeed ku tagi doonta Jabuuti inta u dhaxaysa 6-da iyo 7-da Febraayo, ka hor inta aysan u sii gudbin Soomaaliya.

Dirista maraakiibtan dagaal ayaa lagu tilmaamay tallaabo muhiim ah oo lagu xoojinayo iskaashiga difaac iyo dhaqaale ee u dhexeeya Ankara iyo Muqdisho. Heshiis ay labada dal kala saxiixdeen sannadkii hore ayaa Turkiga u xilsaaray ilaalinta biyaha Soomaaliya iyo ka gacan-siinta horumarinta kheyraadka badda ee qaranka, taasoo sii xoojinaysa doorka Turkiga ee dhinaca amniga Geeska Afrika.