Soomaaliya, 6 Febraayo 2026 (Dawan)— Golaha Wasiirrada Federaalka Soomaaliya ayaa ku dhawaaqay in abaaraha ka jira dalka ay yihiin arrin qaran oo xasaasi ah, isla markaana u baahan waxqabad degdeg ah oo midaysan, sida lagu sheegay war ka soo baxay Xafiiska Ra’iisul Wasaaraha Khamiistii.
Golaha Wasiirrada, oo uu shir-guddoominayay Ra’iisul Wasaare Xamse Cabdi Barre, ayaa dib u eegis ku sameeyay warbixin ay soo gudbiyeen Wasaaradda Qorsheynta iyo hay’adaha kale ee khuseeya, taas oo faahfaahin ka bixinaysay saameynta daran ee ka dhalatay roobabkii xilliyeedka ee baaqday.
Warbixintu waxay tilmaantay in roob-yaraantu ay saameysay in ka badan 74 degmo oo ku kala yaalla guud ahaan dalka, iyadoo ay waxyeello gaartay qiyaastii 4.8 milyan oo qof iyo in ka badan laba milyan oo neef oo xoolo ah. Sidoo kale, in ka badan 200,000 oo qof ayaa ku barakacay biyo, cunto iyo daaq la’aan, taas oo halis toos ah ku ah nolosha dadka iyo sugnaanta cunnada.
Golaha Wasiirrada ayaa ka digay in xaaladdu ay kasii dari karto, isla markaana isu beddeli karto macaluul baahsan haddii aan si degdeg ah wax looga qaban. Madaxa Hay’adda Maareynta Musiibooyinka Soomaaliyeed (SoDMA), Cabdulle, ayaa sheegay in xaaladdu ay gaartay “marxalad khatar ah”.
