Xarunta cusub ee Cadaaladda oo laga dhax dhigay Jigjiga

Jigjiga (Dawan)- Dawlad Deegaanka Soomaalida ayaa bilaawday dhismaha xarun cusub oo cadaaladda ah oo laga hirgelinayo magaalada Jigjiga. Mashruucan ayaa ku kacaya in ka badan 222 milyan oo birr (qiyaastii $1.43 milyan), waxaana si buuxda loogy maalgeliyay miisaaniyadda deegaanka, sida ay sheegtay warbaahinta DDS.

Tallaabadani ayaa lagu sheegay inay muujinayso sida dowladda uga go’an tahay casriyeynta kaabayaasha sharciga, iyada oo aan ku tiirsanayn kaalmo dhaqaale oo dibadda ah.

Madaxweynaha Deegaanka, Mustafe Maxamed Cumar, ayaa hoggaamiyay xafladda dhagax-dhigga Jimcihii, waxaana weheliyay Wasiirka Horumarinta Magaalooyinka iyo Dhismaha, Axmed Shugri, iyo Wasiirka Cadaaladda, Maxamed Naaji Maxamed.

Mashruucan, oo ah dhismo toddoba dabaq ah , waxaa maamuli doona Xafiiska Horumarinta Magaalooyinka iyo Dhismaha ee DDS, waxaana la filayaa inuu mideeyo howlaha sharciga, isagoo sidoo kale noqon doona xarun casri ah oo waaxda cadaaladda ee gobolka ah.

Madaxweyne Mustafe oo ka hadlayay munaasabadda ayaa carabka ku adkeeyay in xarunta cusubi ay udub dhexaad u tahay hadafka gobolka ee ah in cadaaladda laga dhigo mid u dhow oo u fudud muwaadiniinta.

"Maaddaama dowladnimadu ay ka bilaabato meel lagu shaqeeyo iyo goob ku habboon bixinta adeegga bulshada, degmooyin badan ayaan ka hirgelinnay xafiisyo dowladeed," ayuu yiri Madaxweyne Mustafe, isagoo xusay in maamulkiisu mudnaanta siiyay kaabayaasha dhaqaalaha tan iyo markii uu xilka la wareegay. Wuxuu iftiimiyay in xafiisyada dowladda laga dhisay in ka badan 41 degmo oo gobolka ah.

Madaxweynaha ayaa sidoo kale caddeeyay in mashruuca iyo kuwa kale ee la midka ah lagu maalgeliyo miisaaniyadda gobolka oo kaliya, iyadoo aan la helin wax kaalmo dhaqaale oo dibadda ah.

Mas'uuliyiin deegaanka, odayaal dhaqameed, iyo hoggaamiyeyaal bulsho ayaa ka soo qaybgalay xafladda, taasoo warbaahinta Dowlad Deegaanka Soomaalida ay ku tilmaamtay inay tahay guul weyn oo laga gaaray dadaallada socda ee lagu dhisayo nidaam garsoor oo hufan oo wax ka qabta baahiyaha shacabka.