Xasan oo Doha uga sii gudbay Qaahira

Masar, 8 Febraayo 2026 (Dawan)– Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa xalay oo Sabti ah gaaray magaalada Qaahira, halkaas oo uu ku tegay booqasho rasmi ah oo heer qaran ah, sida ay sheegtay Madaxtooyada Soomaaliya.

Madaxtooyadu waxay intaas ku dartay in Xasan Sheekh Maxamuud uu wada-hadallo heer sare ah la yeelan doono Madaxweynaha Jamhuuriyadda Carabta ee Masar, Cabdifataax Al-Sisi.

Wada-hadallada labada hoggaamiye ayaa la filayaa inay diiradda saaraan xoojinta iskaashiga laba-geesoodka ah, arrimaha amniga gobolka, iyo ilaalinta marinada ganacsiga ee muhiimka u ah dhaqaalaha caalamiga ah.

“Booqashadu waa qayb ka mid ah dadaallada joogtada ah ee lagu xoojinayo xiriirka diblomaasiyadeed iyo iskaashiga istaraatiijiyadeed ee ka dhexeeya labada dal ee walaalaha ah,” ayaa lagu yiri war-saxaafadeed ka soo baxay Villa Soomaaliya.

booqashada Madaxweyne Xasan Sheekh Maxamuud ee Masar ayaa ku soo beegmaya kaddib safar uu maalmahan ku tagay dalka Qatar, kaas oo qayb ka ahaa booqashooyin diblomaasiyadeed oo xiriir ah.

Soomaaliya ayaa dadaal ugu jirta xoojinta taageerada caalamiga ah, kaddib aqoonsigii ay Israa’iil si rasmi ah ugu dhawaaqday inay siisay Somaliland Bishii December ee lasoo dhaafay, go'aankaas oo noqday mid ay walaac ka muujiyaan dowlado badan iyo ururrada gobolka iyo kuwa caalamiga ah