Qadar, 7 Febraayo 2026 (Dawan)– Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta oo Sabti ah ku eedeeyay Israa’iil inay si sharci-darro ah faragelin ugu hayso arrimaha gudaha ee Soomaaliya, isagoo ka digay in falalka noocan ah ay khatar ku yihiin amniga Badda Cas iyo guud ahaan Geeska Afrika.
Isagoo ka hadlayay Madasha Al Jazeera ee ka dhacday magaalada Doha, Madaxweyne Xasan Sheekh Maxamuud ayaa aqoonsiga ay Israa’iil siisay madaxbannaanida Somaliland bishii December ku tilmaamay “tallaabo degdeg ah oo aasaas ahaan khaldan,” taas oo si cad ugu xadgudbaysa sharciga caalamiga ah iyo midnimada dhuleed ee Jamhuuriyadda Federaalka Soomaaliya.
“Tallaabada Israa’iil ma aha oo kaliya xadgudub ka dhan ah madaxbannaanida iyo wadajirka dhuleed ee Soomaaliya, balse waxay caqabad ku tahay jiritaanka aasaasiga ah ee Qaaradda Afrika,” ayuu yiri Madaxweynaha, isagoo xusay axdiga Midowga Afrika ee adkeynaya ilaalinta xuduudaha taariikhiga ah ee dalalka xubnaha ka ah.
Madaxweyne Xasan ayaa carrabka ku adkeeyay muhiimadda istiraatiijiga ah ee Badda Cas, oo uu ku tilmaamay “halbowle dhaqaale oo laf-dhabar u ah ganacsiga caalamiga ah,” isagoo ka digay in khilaafaadka dhuleed iyo faragelinta shisheeye ay sii kordhinayaan khatarta xasillooni-darrada gobolka.
