Yurub oo gaadiid iyo qalab ciidan ku wareejisay Soomaaliya

Muqdisho (Dawan)— Midowga Yurub ayaa maanta oo Talaado ah ku wareejiyay Ciidanka Xoogga Dalka Soomaaliyeed (CXDS) gaadiid, qalab saadka ah iyo taageero dhanka kaabayaasha ah, kuwaas oo uu maalgeliyay Sanduuqa Nabadda ee Yurub (European Peace Facility – EPF).

Qalabka la wareejiyay ayaa isugu jira gaadiid ciidan, agab farsamo, dhammaystirka Xarunta Dhexe ee Isgaarsiinta ee Villa Baydhabo, iyo dhismaha Isbitaalka Qaybta 27-aad ee CXDS ee magaalada Buulo Burde.

Taageeradan ayaa ujeedadeedu tahay xoojinta awoodda hawlgallada, horumarinta adeegyada caafimaadka, iyo tayaynta isgaarsiinta guud ahaan dalka, si loo adkeeyo dadaallada lagu xaqiijinayo amniga Soomaaliya.

Munaasabadda wareejinta oo ka dhacday xarunta Xalane ee magaalada Muqdisho ayaa waxaa ka qayb galay Safiirka Midowga Yurub ee Soomaaliya, Danjire Francesca Di Mauro, Wasiirka Gaashaandhigga Soomaaliya, Mudane Axmed Macallin Fiqi, Taliyaha xilka kasii degaya ee Ciidanka Xoogga Dalka Soomaaliyeed, Sareeye Gaas Odowaa Yuusuf Raage iyo mas'uuliyiin kale oo ka socday ciidanka iyo Yurub.

Danjire Francesca Di Mauro oo hadal ka jeedisay munaasabadda ayaa carrabka ku adkaysay in Midowga Yurub uu weli yahay saaxiib la isku halleyn karo, kana go’an tahay taageeridda nabadda, amniga iyo xasilloonida Soomaaliya.

Wareejintan ayaa ku soo beegmaysa xilli dhowaan Midowga Yurub iyo Soomaaliya ay kala saxiixdeen heshiis iskaashi oo ku kacaya €102 milyan (oo u dhiganta $120 milyan), kaas oo lagu taageerayo amniga, maamul-wanaagga iyo horumarka dalka saddexda sano ee soo socota.