Muqdisho, 1 Febraayo 2026 (Dawan)— Safiirka Midowga Yurub ee Soomaaliya, Francesca Di Mauro, ayaa niyad jab ka muujisay caqabadaha soo food saaray u diyaargarowga wada-hadallada siyaasadeed ee muddada dheer la sugayay, kuwaas oo lagu waday nay ka qabsoomaan Muqdisho.
Safiir Di Mauro ayaa qoraal ay ku daabacday barta X ku sheegtay inay tahay “wax laga xumaado” in wafdiga hordhaca ah ee ka socday maamul-goboleedyada Puntland iyo Jubaland ay maanta ku guuldarreystaan inay soo gaaraan caasimadda.
“Waa wax laga xumaado in kooxaha hordhaca ah ee Puntland iyo Jubaland ay maanta imaan waayeen Muqdisho,” ayay tiri safiirku.
Waxay intaas ku dartay in arrintan ay u muuqato mid ka dhalatay “is-faham la’aan”, iyadoo muujisay rajadeeda ah in dhammaan dhinacyadu ay xal u heli doonaan si wada-hadalkan muhiimka ahi u qabsoomo, loona abuuro jawi ku habboon doodaha nuxurka leh, kuwaas oo horseedi kara jid cad oo ku aaddan geeddi-socodka doorashooyinka.
Hadalkan ayaa imanaya kaddib markii Dowladda Federaalka Soomaaliya ay celisay diyaarado ka soo kacay Kismaayo iyo Garoowe, kuna soo jeeday Muqdisho, kuwaas oo siday kooxo hordhac ah iyo ilaalada madaxweynayaasha Puntland iyo Jubaland.
Hoggaamiyeyaasha labada maamul-goboleed ayaa ka mid ah Golaha Mustaqbalka Soomaaliya, waxaana lagu wadaa inay ka qeybgalaan madasha wadatashiga qaran ee la rajeynayo inah ka dhacdo Muqdisho.
Wada-tashiyada qorshaysan ee Muqdisho ayaa qayb ka ah dadaallo ay taageerayaan beesha caalamka, kuwaas oo lagu doonayo in lagu xalliyo is-mari-waaga siyaasadeed ee muddo dheer soo jiitamayay, gaar ahaan khilaafka la xiriira hannaan-doorashada dalka ee sanadkan, ka hor inta aanay dhammaan muddada xil-haynta hay’adaha muhiimka ah ee dowladda.
Dowladda Federaalka Soomaaliya iyo isbahaysiga mucaaradka ee loo yaqaan Golaha Mustaqbalka Soomaaliya — oo ay ku jiraan hoggaamiyeyaasha Puntland iyo Jubaland — ayaa si weyn isugu khilaafsan u guurista nidaamka doorashada dadban ee ku saleysan hab-qabiil, loona wareegayo nidaamka qof iyo cod, iyadoo qaar ka mid ah mucaaradka ay ku doodayaan in isbeddelkan loo adeegsan karo kordhinta muddo-xileedyada siyaasadeed.
Maalmihii la soo dhaafay, Midowga Yurub ayaa soo dhaweeyay go’aankii Golaha Mustaqbalka Soomaaliya ay ku aqbaleen martiqaadka dowladda federaalka ee ka qeybgalka madasha wadatashiga ee Muqdisho, oo la filayay inay bilaabato 1-da Febraayo. Midowga Yurub ayaa tallaabadaas ku tilmaamay mid wax ku ool ah, hase yeeshee ku adkeeyay baahida loo qabo in la helo jawi ku habboon wada-hadallo dhab ah oo miro-dhal ah.
