Yurub oo soo dhaweysay ka qeybgalka mucaaradka ee Wadatashiga Qaran

Muqdisho (Dawan)- Midowga Yurub ayaa soo dhoweeyay go’aanka Golaha Mustaqbalka Soomaaliya ee ka qeybgalka madasha la-tashiga qaran ee la qorsheeyay 1-da Febraayo, waxa uuna tallaabadaas ku tilmaamay mid togan oo wax ku ool ah, kana tarjumaysa rabitaan lagu xoojinayo xasilloonida siyaasadeed ee dalka.

Wakiilka Midowga Yurub ee Soomaaliya, Francesca Di Mauro, ayaa Isniintii bogaadisay aqballaadda golaha ee casuumaadda uu diray Madaxweynaha Soomaaliya Xasan Sheekh Maxamuud, kaddib kulankii ugu dambeeyay ee xubnaha mucaaradka, iyada oo barteeda X kusoo qortay “Tani waa calaamad togan oo wax ku ool ah. Waxa hadda loo baahan yahay waa jawi ku habboon wadahadal miro-dhal ah,” .

Golaha Mustaqbalka Soomaaliya, oo ay ka mid yihiin hoggaamiyeyaal dowlad-goboleed iyo mas’uuliyiin hore oo xilal sare ka soo qabtay dalka, ayaa khilaaf kala dhexeeya dowladda federaalka, gaar ahaan qorshayaasha la xiriira u gudbidda nidaamka doorasho ee ‘hal qof, hal cod’.

In kasta oo ay aqbaleen ka qeybgalka madasha la-tashiga, haddana goluhu wuxuu ku baaqay in si buuxda loo hakiyo wax ka beddelka Dastuurka Kumeel Gaarka ah ee 2012, si wadahadalladu u noqdaan kuwo miro-dhal ah oo lagu gaari karo is-afgarad qaran.