Garoowe – Madaxweyne ku-xigeenka Dowladda Puntland, Ilyaas Cismaan Lugatoor, ayaa si cad u sheegay in Puntland ay ka walaacsan tahay guuldarrada ku habsatay Dowladda Federaalka Soomaaliya ee la xiriirta dagaalka ka dhanka ah kooxda Al-Shabaab, gaar ahaan joogitaanka kooxdaasi ee weli ka arrimisa deegaannada muhiimka ah sida Afgoye iyo Balcad.
Lugatoor ayaa hadalkan ka sheegay munaasabad ballaaran oo ka dhacday magaalada Garoowe, halkaas oo shacabka Puntland ay ku muujiyeen taageero buuxda oo ay la garab taagan yihiin ciidamada Puntland ee ku hawlan howlgalka ciribtirka argagixisada.
Madaxweyne ku-xigeenku wuxuu sheegay in Puntland ay horumar la taaban karo ka samaysay dagaalkii lagula galay kooxda Daacish iyo weerarradii ay fuliyeen kooxaha. Waxa uu u duceeyay ciidamada Puntland ee ku dhintay dagaalka, isaga oo sidoo kale u mahadceliyay dhammaan shacabka iyo ciidamada kale ee garab istaagay howlgalka.
“Guulaha aan gaarnay waa kuwa Alle naga siiyay sabirkeena iyo qorsheynta wanaagsan ee dowladda. Dadka reer Puntland waxay muujiyeen midnimo iyo go’aan cad oo ku saabsan la-dagaalanka kooxaha khatarta ku ah nabadda,” ayuu yiri Madaxweyne ku-xigeenka.
Lugatoor wuxuu si gaar ah u dhaleeceeyay Dowladda Federaalka, isaga oo sheegay in muddo dheer laga shaqeynayay dhismaha ciidamada qaranka balse maanta aysan wax saameyn ah ku laheyn dagaalka ka dhanka ah Al-Shabaab. Wuxuu xusay in ay tahay arrin laga xumaado in kooxdaasi weli joogto meelaha u dhow caasimadda sida Afgoye iyo Balcad.
“Waxaan leenahay Dowladda Federaalka: ku mashquula cadowga dalka iyo dadka Soomaaliyeed, ma ahan in aad siyaasadda gudaha ku mashquushaan halka dalkii intiisa badan ay qabsadeen kooxaha argagixisada,” ayuu yiri.
Madaxweyne ku-xigeenka wuxuu sidoo kale farriin u diray dowlad-goboleedyada kale ee dalka, isagoo ku boorriyay in mid walba ay mas’uuliyadda ka saaran amniga iyo horumarka deegaankooda ay si dhab ah u qaataan.
“Waa in dowlad-goboleed kasta uu wax ka qabtaa amniga deegaanadiisa, cid walbana ay ka shaqeyso sidii looga hortegi lahaa khatarta argagixisada. Mas’uuliyadda dalka meel kaliya kuma koobna,” ayuu hadalkiisa ku soo gunaanaday.
