Muqdisho (Dawan)- Qodobada ugu waaweyn wararka dunida oo kooban waxaa ka mid ah:
Muqdisho
Hoggaamiyayaasha mucaaradka Soomaaliya, oo ay ku jiraan Madaxweyne hore Sheekh Shariif Axmed, Ra’iisul Wasaarihii hore Omar Abdirashid, Said Shirdoon, Xasan Khayre, Maxamed Rooble, iyo Guddoomiyeyaashii hore ee Baarlamaanka Sheekh Xasan iyo Maxamed Mursal, ayaa maanta shir weyn ka furay Muqdisho.
Muqdisho
Madaxweynaha Soomaaliya, Xasan Sheekh Maxamuud, ayaa markale u magacaabay Xasan Maxamed Xuseen (Muungaab) inuu noqdo Guddoomiyaha Gobolka Banaadir iyo Duqa Caasimadda Muqdisho. Magacaabistan ayaa timid iyadoo Wasaaradda Arrimaha Gudaha, Federaalka iyo Dib-u-Heshiisiinta ay soo jeedisay xilka qaadista gudoomiyihii hore ee Gobolka Maxamed Axmed Amir.
Djibouti
Dowladda Djibouti ayaa si rasmi ah u ansixisay Istaraatiijiyadda Qaranka ee Amniga Internetka ee 2024-2030, taasoo lagu meel mariyay Golaha Wasiirrada. Istaraatiijiyaddan oo ay hormuud ka tahay Wasaaradda Dhaqaalaha Dijitaalka iyo Hal-abuurka, ayaa ujeeddadeedu tahay in la dhiso nidaam qaran oo dhamaystiran oo lagula dagaallamayo hanjabaadaha internetka isla markaana la xaqiijiyo madaxbannaanida dijitaalka ee dalka.
Kismaayo
Taliska Ciidamada Mareykanka ee Afrika (AFRICOM), oo kaashanaya Dowladda Federaalka Soomaaliya, ayaa 24-kii May 2025 fuliyay weerar cirka ah oo lagu bartilmaameedsaday xubno ka tirsan kooxda Al-Shabaab.
Jigjiga
Madaxweynaha Dowlad Deegaanka Soomaalida, Mustafe Muxummed Cumar, ayaa kulan la qaatay saamileyda siyaasadeed ee Deegaanka Soomaalida, iyadoo looga hadlay xaaladda guud ee Itoobiya iyo deegaanka, gaar ahaan arrimaha siyaasadda iyo amniga.
