Muqdisho (Dawan)- Qodobada ugu waaweyn wararka dunida oo kooban waxaa ka mid ah:
Jigjiga
Shirweynaha Wadatashiga Bahda Ganacsiga ayaa 30 Maajo 2025 lagu qabtay magaalada Jigjiga, caasimadda Dowlad-Deegaanka Soomaalida (DDS), iyadoo mowduuca looga hadlayay ahaa “Doorka Bahda Ganacsigu Waa Lafdhabarta Barwaaqada Aan Hiigsanayno.”
Nairobi
Taliyaha ciidamada Mareykanka ee Africa (AFRICOM), General Michael Langley, ayaa sheegay in Mareykanka uu kordhiyey dadaallada lagula dagaallamayo kooxaha jihadiyaadka ee Bariga Afrika, iyagoo taageero ka helaya Dowladda Federaalka Soomaaliya.
Jowhar
Dowlad Goboleedka Hirshabeelle ee Soomaaliya ayaa maanta buuxisay laba kursi oo Baarlamaanka Federaalka ka bannaaneyd muddo ku dhow labo sano, kuwaas oo deegaan doorashadoodu ay ahayd Hirshabeelle.
Muqdisho
Hay’adda Maareynta Musiibooyinka Qaranka ee SoDMA ayaa 30 May 2025 dirtay 10 gaari oo shixnad gargaar degdeg ah oo raashin ah, u dirtay deegaanka Lambar Konton iyo tuulooyinka ku xeeran, kuwaas oo dhawaan ay ka dhaceen dagaalo.
Nairobi
Dowladda Federaalka Soomaaliya ayaa markii ugu horreysay ku guuleysatay in si rasmi ah xubin uga noqoto Golaha Fulinta ee Hay’adda Qaramada Midoobay ee horumarinta magaalooyin(UN-Habitat).
Mareykanka
Wasiirka Ganacsiga iyo Dalxiiska ee Jabuuti, Maxamed Warsame Diiriyeh, ayaa 29 May 2025 guddoominayay shir ganacsi oo lagu qabtay Djibouti, kaasoo uu soo qabanqaabiyay Guddiga Ganacsiga dalkaas.
