tobanaan qof oo guri la’aan ah, oo ay ku jiraan in ka badan 90 carruur ah, ayaa habeenimadii Talaadada ku hoyday bannaanka xarunta Magaakada Paris, iyagoo dalbanaya in si degdeg ah loogu helo guryo ay ku hoydaan, sida ay sheegtay hay’adda taageerta muhaajiriinta ee Utopia 56.
Bannaanbaxa oo uu qabanqaabiyay ururka Utopia 56 ayaa bilaabmay fiidkii Talaadada wuxuuna socday ilaa subaxnimadii Arbacada. Hay’addu waxay sheegtay in ka badan 200 qof — oo kala bar ay yihiin carruur lagu qasbay in ay dhulka seexdaan.
Fatuma Cali, oo ah qaxooti Soomaaliyeed kuna nool Faransiiska tan iyo 2018, ayaa sheegtay in ay horey u deganeyd guri ay bixiyeen adeegyada bulshada, balse guryo la’aan awgeed looga saaray shan bilood ka hor.
“Tan iyo markaas, waxaan ku hoydaa waddooyinka ama basaska habeenkii aniga iyo carruurteyda,” ayay tiri Fatuma Cali.
Wakiilka guud ee Utopia 56, Yan Manzi, ayaa sheegay in ay sii joogayaan halkaas ilaa guryo la siiyo. Dowladda hoose ee Paris ayaa sheegtay in ay sii waddo bixinta hoy sanadka oo dhan, iyadoo hadda ay deggan yihiin in ka badan 1,000 qof, gaar ahaan qoysas la dajiyay garoomo ciyaareed oo la beddelay. Waxay ugu baaqday dowladda dhexe ee Faransiiska in ay mas’uuliyad la wadaagto.
Bannaanbaxan ayaa muujinaya culayska sii kordhaya ee haysta nidaamka hoyga Faransiiska, gaar ahaan qoysaska muhaajiriinta iyo qaxootiga ee wajahaya dib-u-dhacyo iyo fursad yarida adeegyada dowladda.
