Jabuuti – Raiisul Wasaaraha Jabuuti, Cabdoulkader Kamil Mohamed, ayaa ka qeybgalay Shirweynaha AI Action Summit oo lagu soo gabagabeeyay Paris, kaddib casuumaad rasmi ah oo uu ka helay Madaxweynaha Faransiiska Emmanuel Macron. Shirka, oo dhacay intii u dhaxeysay 6-11 Febraayo 2025, ayaa diiradda saaray saameynta caalamiga ah ee sirdoonka macmalka ah (AI) ku leeyahay horumarka dunida.
Sida ay baahiyeen warbaahinta Jabuuti, Raiisul Wasaare Maxamed ayaa khudbad ka jeediyay shirka, isagoo carrabka ku adkeeyay fursadaha iyo caqabadaha Afrika ay kala kulmayso hirgelinta AI. Wuxuu xusay in tiknoolojiyadda casriga ahi fursad weyn u tahay horumarinta dhaqaalaha, waxbarashada, iyo adeegyada dadweynaha ee qaaradda.
Raiisul Wasaaraha ayaa sharaxaad ka bixiyay faa’iidooyinka AI ay Afrika u leedahay, gaar ahaan:
- Waxbarashada – Ka faa’iidaysiga AI si casriyaynta iyo horumarinta nidaamka waxbarashada.
- Caafimaadka – Isticmaalka AI si loo horumariyo kaabayaasha iyo helitaanka adeegyada caafimaadka.
- Ka-qaybgalka Dhaqaalaha – Kobcinta dhaqaalaha iyo ballaarinta fursadaha shaqo.
- Horumarinta Warshadaha – Horumarinta warshadaha iyo kaabayaasha iyada oo loo marayo xalal ku saleysan AI.
Wuxuu ku booriyay dalalka Afrika inaysan ku koobnaan oo kaliya isticmaalkii AI ee dalal kale sameeyaan, balse ay noqdaan kuwo si firfircoon uga qeybqaata horumarinta iyo hal-abuurka AI.
“Afrika waa inay noqotaa qayb firfircoon oo ka mid ah horumarinta AI, halkii ay noqon lahayd suuq kaliya oo lagu iibiyo xalal ay dalal kale sameeyeen,” ayuu yiri Raiisul Wasaare Maxamed.
Bayaankii ugu dambeeyay ee shirka ayaa lagu adkeeyay in horumarka AI aanu noqon mid faa’iido u leh kaliya koox gaar ah, balse uu noqdo mishiin kobcinaya horumarka caalamka oo dhan, si dhammaan bulshooyinka ay uga faa’iidaystaan.
