By Abukar Osman
Mogadishu, — Ra’iisul Wasaaraha Soomaaliya, Xamsa Cabdi Barre, ayaa ka qeyb galay munaasabadda xuska Maalinta Yurub ee 2025, isagoo ka hadlay xiriirka iyo iskaashiga muhiimka ah ee ka dhexeeya Soomaaliya iyo Midowga Yurub. Munaasabaddan oo ka dhacday magaalada Muqdisho, ayaa diiradda lagu saaray horumarka labada dhinac ay wada gaareen iyo taageerada Midowga Yurub ee Soomaaliya, gaar ahaan dhinacyada amniga, dhaqaalaha, gargaarka bani’aadannimada, iyo dib-u-dhiska dalka.
Ra’iisul Wasaaraha ayaa si gaar ah u sheegay in Midowga Yurub uu door muhiim ah ka ciyaaray taageerada Soomaaliya ee dhinacyada amniga, horumarka dhaqaalaha, gargaarka bani’aadannimada, iyo dib-u-dhiska dalka. Waxa uu sidoo kale xusay in iskaashiga labada dhinac uu muhiim u yahay sidii loo gaari lahaa horumar waara iyo nabad buuxda.
Horumarka Soomaaliya ee Dimuqraadiyeynta
Ra’iisul Wasaaraha Xamsa Cabdi Barre ayaa sidoo kale xusay horumarka la taaban karo ee Soomaaliya ka samaysay hannaanka dowlad dhiska iyo dimuqraadiyeynta dalka. Waxa uu sheegay in Soomaaliya ay ku tallaabsatay horumar muhiim ah, gaar ahaan shirkii ugu dambeeyay ee Golaha Wadatashiga Qaranka (NCC), oo ay ka soo baxeen go’aamo wax ku ool ah oo horumarinaya dalka.
“Waxaan seeska u dhigaynaa hannaanka doorasho ee loo dhanyahay, kaas oo ka madax bannaan faragelin iyo cabsi. Inkastoo ay tahay hawl adag, haddana waxaan ognahay in dimuqraadiyaddu ay mudan tahay,” ayuu raaciyay Ra’iisul Wasaaraha.
Hadafka Doorashada Soomaaliya
Xamsa Cabdi Barre ayaa sheegay in hadafka dowladdu yahay sidii loo qaban lahaa doorasho qof iyo cod ah oo ka dhacda dhammaan gobollada dalka, isagoo sidoo kale caddeeyay in aanay jiri doonin doorasho dadban. Ra’iisul Wasaaraha ayaa tilmaamay in dadka Soomaaliyeed ay si toos ah go’aan uga gaari doonaan cidda hoggaamin doonta dalka, taas oo ka turjumeysa rabitaanka shacabka iyo hannaanka dimuqraadiyadeed ee dalka.
Dhismaha Mustaqbalka Nabad iyo Horumar
Munaasabadda xuska Maalinta Yurub ee 2025 ayaa lagu adkeeyay in Soomaaliya ay u baahan tahay iskaashi dheeraad ah iyo taageero joogto ah si loo gaaro mustaqbal nabad ah oo waara. Iskaashiga la xoojiyey ee Soomaaliya iyo Midowga Yurub ayaa ah furaha horumarka iyo xasilloonida dalka.
