Muqdisho, Soomaaliya – Madaxweynaha Jamhuuriyadda Federaalka Soomaaliya ayaa si rasmi ah u dhagax dhigay Gateway Complex, mashruuc horumarineed oo taariikhi ah oo qeyb ka ah dib u dhiska iyo kobcinta dhaqaalaha iyo kaabayaasha magaalooyinka Soomaaliya.
Xafladda oo lagu qabtay Bancario Complex, Airport Road, waxaa kasoo qeyb galay mas’uuliyiin sare oo ka tirsan dowladda, oo ay ku jiraan Wasiirka Maaliyadda, Wasiirka Qorsheynta iyo Iskaashiga Caalamiga, Wasiirka Warfaafinta iyo Dalxiiska, Ku-xigeenka Guddoomiyaha Bangiga Dhexe ee Soomaaliya, iyo Xildhibaano ka tirsan Baarlamaanka. Waxaa sidoo kale ka soo qeyb galay hoggaamiyeyaal muhiim ah oo ka socda bahda ganacsiga, oo ay ku jiraan Guddoomiyaha Riverside Holding, Guddoomiyaha Rugta Ganacsiga Soomaaliyeed, iyo ganacsato caan ah.
Gateway Complex waa mashruucii ugu horreeyay noociisa ah ee Soomaaliya laga hirgeliyo, wuxuuna astaan u yahay horumarka iyo soo kabashada qaranka. Mashruuca waxa uu ka kooban yahay:
- Hoteelka ugu horreeya ee 5-star ah ee Soomaaliya oo ay maamuli doonto shirkadda caalamiga ah ee martigelinta ee Rotana.
- Xarunta Shirarka Caalamiga ah oo casri ah, oo leh awood ay ku fariisan karaan ilaa 5,000 qof.
- Guryo deegaan ah oo heer sare ah, cusbitaal 300 sariir leh, dugsi waxbarasho, suuq ganacsi oo weyn, iyo xarumo madadaalo oo tayo sare leh.
Madaxweynaha oo ka hadlayay xafladda dhagax dhiga ayaa carrabka ku adkeeyay doorka mashruucan ee ku aaddan kobcinta horumarka dalka:
“Gateway Complex waxa uu ka tarjumayaa diyaar u ahaanshaha Soomaaliya inay qaabisho mustaqbal ifaya. Waxa uu astaan u yahay horumar, midnimo, iyo fursado loo abuurayo shacabkeenna, iyadoo la keenayo xarumo heer caalami ah oo soo jiidan doona maalgashadayaasha gudaha iyo dibadda. Tani waa xilli taariikhi ah oo u soo kordhay Muqdisho iyo qarankeenna.”
Guddoomiyaha Riverside Holding, oo ah hormuudka mashruucan, ayaa sheegay sida ay shirkaddu uga go’an tahay inay hirgeliso mashaariic kor u qaada dhaqaalaha iyo nolasha bulshada:
“Gateway ma aha oo keliya mashruuc; waa farriin muujinaysa kalsoonida aan ku qabno awoodda Soomaaliya. Mashruucan waxa uu abuuri doonaa shaqooyin, soo jiidan doonaa maalgashi, wuxuuna bulshada siin doonaa adeegyo muhiim ah oo sare u qaadaya tayada nolasha.”
Gateway Complex waxa uu abuuri doonaa kumanaan shaqo oo toos ah iyo kuwo dadban intii lagu guda jiro dhismaha iyo howlgalinta, isagoo kobcin doona shaqooyinka gudaha iyo ganacsiyada silsiladda sahayda ah. Mashruucani waxa uu Muqdisho ka dhigi doonaa xarun goboleed oo ganacsi, caafimaad, dalxiis, iyo nolol tayo leh.
Xafladda dhagax dhiga ayaa lagu soo gebogabeeyey soo bandhigidda qorshaha mashruuca iyo dhagax dhigga.
Faahfaahin Ku Saabsan Gateway Complex:
Gateway Complex waa mashruuc horumarineed oo casri ah oo laga hirgelinayo Muqdisho, Soomaaliya. Waxa uu ka kooban yahay hoteelkii ugu horreeyay ee 5-xiddigle ah, xarunta shirarka caalamiga ah, cusbitaal casri ah, dugsi waxbarasho, suuq ganacsi, guryo degaan, iyo xarumo madadaalo. Waxa mashruucan maal gelinaayo shirkadda Riverside Holding, waxaana uu noqon doonaa iftiinka koboca dhaqaale, dib u habeynta magaalada, iyo fursadaha cusub ee Soomaaliya.
