Hargeysa – Fadhigii 14-aad ee Golaha Wasiirrada Somaliland oo uu shir-guddoominayay Madaxweynaha Somaliland, Cabdiraxmaan Maxamed Cabdilaahi (Cirro), ayaa Arbacadii ka dhacay Qasriga Madaxtooyada, iyadoo warbixin muhiim ah laga dhageystay Wasaaradda Maaliyadda iyo Horumarinta Dhaqaalaha ee ku saabsan koboca miisaaniyadda rubuc-sannadeedka koowaad ee 2025.
Wasiirka Maaliyadda ayaa sheegay in saddexda bilood ee ugu horraysay sannadka miisaaniyadeedka 2025 uu gaaray koror 19% ah marka la barbardhigo isla muddadaas sanadkii hore (2024).
“Wasiirka waxa uu Golaha u sheegay in nasiib wanaag ay muuqato koror xagga dakhliga ah oo gaaraya 19% marka loo eego sannadkii hore,” ayaa lagu yiri qoraal ka soo baxay Madaxtooyada Somaliland.
Wasiirka ayaa sidoo kale iftiimiyay in lagu guuleystay isku xirka nidaamka canshuuraha shirkadaha korontada iyo isgaarsiinta, taas oo sare u qaaday dakhliga guud ee Soomaaliland iyo hufnaanta maamulka maaliyadeed.
Waxaa la sheegay in kororka dakhliga uu ka dhashay dadaallada Wasaaradda Maaliyaddu ku bixisay:
- Tayeynta nidaamka ururinta cashuuraha.
- Horumarinta nidaamka lacag ururinta.
- Kordhinta daahfurnaanta maaliyadeed.
Sidoo kale, kororkani wuxuu ku soo beegmayaa xilli Somaliland ay bishii Febraayo dhaqan gelisay cashuur cusub oo iibka ah, taas oo qeyb ka ah dadaallada lagu horumarinayo dhaqaalaha gudaha.
Koboca miisaaniyadeed ee la shaaciyay ayaa loo arkaa mid dhiirigelin leh oo muujinaya xasilooni iyo horumar dhaqaale oo gudaha Somaliland ka hirgalaya.
