Muqdisho (Dawan) –Wasaaradda Maaliyadda Soomaaliya ayaa Arbacadii ku amartay dhammaan shirkadaha diyaaradaha caalamiga ah ee ka hawlgala dalka inay xogta rakaabka iyo qiimaha tikidhada ku gudbiyaan oo keliya nidaamka cusub ee dhijitaalka ah ee SOMCAS, taas oo calaamad u ah ka guurista hab-raacyadii gacanta lagu qaban jiray.
Amarkan oo uu soo saaray Agaasimaha Guud ee Dakhliga, ayuu sheegay inay qeyb ka tahay dadaallada dowladda ee casriyeynta maaliyadda iyo kastamka. Wasaaraddu waxay sheegtay in tallaabadani loogu talagalay in lagu xoojiyo daahfurnaanta, lagu hagaajiyo uruurinta canshuuraha, isla markaana la xiro farqiga ka jira waajibaadka canshuur-bixinta ee qaybta duulimaadyada.
“Shirkadaha diyaaradaha waxaa si adag looga doonayaa inay soo gudbiyaan xog dhammaystiran oo ku saabsan dhammaan rakaabka dibadda u safaraya iyo qiimaha tikidhadooda, si loo xaqiijiyo isla-xisaabtan hufan,” ayaa lagu yiri wareegtada.
Sida uu dhigayo amarka, shirkadaha diyaaradaha waa inay si degdeg ah uga diiwaangashaan SOMCAS, isla markaana bixiyaan ciwaanada IP-ga dadweynaha haddii ay nidaamka ka geli doonaan dibadda. Xogta rakaabka iyo qiimaha tikidyada waa in si dhijitaal ah loogu gudbiyaa Waaxda Kastamka.
“Xeerka ciqaabta ayaa lagu dabaqi doonaa cid kasta oo ku guuldareysata inay u hoggaansanto sharciga canshuuraha,” ayaa lagu digay wareegtada.
“Dhammaan shirkadaha diyaaradaha waxaa si cad loogu farayaa inay raacaan amarkan, kaas oo fududeyn doona howlaha shirkadaha iyo dowladda labadaba,” ayaa lagu daray.
Mas’uuliyiintu waxay carrabka ku adkeeyeen in dib-u-habayntani loogu talagalay in lagu fududeeyo howlaha isla markaana lagu xaqiijiyo isla-xisaabtan canshuureed oo sax ah qaybta duulimaadyada, oo ka mid ah meelaha dhaqaalaha dalka ugu kobaca badan.
Wasaaradda Maaliyadda ayaa dhawaan bilowday isbeddello danabaysan oo lagu dhimayo ku-tiirsanaanta nidaamyada gacanta, taas oo loo arko mid muhiim u ah maamul wanaagga dhaqaalaha iyo dhismaha dowladnimada Soomaaliya.
