Friday, April 4, 2025
Array

WARARKA DUNIDA OO KOOBAN

Muqdisho (Dawan)- Qodobada ugu waaweyn wararka dunida oo kooban waxaa ka mid ah:

Muqdisho

Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa magacaabay Guddiga Qaran ee Taakuleynta Dagaalka lagula jiro kooxaha Al-Shabaab iyo Daacish. Guddigan oo ka kooban 7 xubnood waxaa hoggaaminaya Ra’iisul Wasaare Ku-xigeenka Labaad, Cabdisalaan Cabdi Cali.

Muqdisho

Wasaaradda Batroolka iyo Macdanta ayaa caddeysay intii lagu guda jiray shirkii Golaha Wasiirrada in shaqada baarista shidaalka ee loo yaqaan (3D Seismic Survey) la soo gabagabeyn doono ka hor dhammaadka sanadkan 2025, si loo cayimo meelaha shidaalku ku jiro looguna gudbo heerka xiga ee qodista ceelasha.

Hargeysa

Miisaaniyadda saddexda bilood ee ugu horreysa sannadka 2025 ee Somaliland ayaa kordhay 19% marka loo eego isla muddadaas sannadkii hore, iyadoo sidoo kale la bilaabay hirgelinta canshuurta iibka bisha labaad ee sannadka.

Jigjiga

War-saxaafadeed ay baahiyeen warbaahinta rasmiga ah ee Dowladda Deegaanka Soomaalida ayaa lagu sheegay in Guddiga Fulinta ee ONLF ay si cad u cambaareeyeen warqad uu dhawaan soo saaray Guddoomiyaha xisbiga, Cabdiraxmaan Mahdi, taas oo uu ku baaqay kacdoon ka dhan ah Dowladda Federaalka Itoobiya.

Laascaanood

Wasaaradda Caddaaladda, Diinta iyo Dastuurka ee Maamulka SSC-Khaatumo ayaa ku baaqday in Salaadda Roob-doonka (Salaatul Istisqaa’) si mideysan looga tukado dhammaan gobollada maamulka maalinta Khamiista, iyadoo laga jawaabayo xaaladda abaarta ka jirta gobolka.

Qaza

Israel ayaa markale qaaday duqeymo culus oo ay ku dishay ugu yaraan 61 Falastiiniyiin ah Arbacadii, iyadoo sidoo kale ku dhawaaqday qorshe ay ku ballaarinayso dagaalka si ay u xajisato dhul hor leh.

Qaza

Hay’adda WFP ee Qaramada Midoobay ayaa sheegtay in dhammaan rootiyooyinkii ay taageeri jirtay ee ku yaallay Gaza ay xirmeen, sababo la xiriira xirnaanshaha isgoysyada Israel taasoo hor istaagtay cunto iyo gargaar bani’aadantinimo.

USA

Madaxweynihii hore ee Mareykanka, Donald Trump, ayaa Arbacadii saxiixay amar madaxweyne oo lagu soo rogay “canshuur celis ah” oo ganacsi, taasoo lagu dabaqayo dhammaan dalalka adduunka marka laga reebo Canada iyo Mexico, si loo xoojiyo warshadaha gudaha iyo wax-soo-saarka Mareykanka.

Hungary

Ra’iisul Wasaaraha Israa’iil, Benjamin Netanyahu, ayaa booqasho rasmi ah ku jooga Hungary — waddan ka tirsan Maxkamadda Dambiyada Caalamiga ah (ICC) — inkasta oo ICC ay hore u soo saartay amar qabasho oo ka dhan ah Netanyahu.

Yaman

Kooxda Xuutiyiinta Yaman ayaa sheegtay in ay weerar ku qaadeen markab dagaal oo Maraykanku leeyahay. Dhanka kale, ugu yaraan 50,000 qof ayaa wajahaya biyo la’aan kaddib duqeyn uu Mareykanku ka geystay gobolka Al-Hudaydah.

New York

Golaha Ammaanka ee Qaramada Midoobay ayaa furanaya dood guud oo ku saabsan xaaladda Falastiin, iyadoo Senatar Bernie Sanders uu wado mooshin lagu hor istaagayo in Maraykanku hub u diro Israel.

Share this article

Recent posts

LEAVE A REPLY

Please enter your comment!
Please enter your name here