Addis Ababa (Dawan)- Warshadaha Bunka ee Itoobiya ayaa la kulmaya caqabado waaweyn sababo la xiriira mamnuucid saddex sano ah oo lagu soo rogay dhoofinta Bunka cayriin ee dalalka kale ee soo saara Bunka, taas oo uu hirgeliyay Guddiga Bunka iyo Shaaha ee Itoobiya bishii Juun 13, 2021.
Mamnuuciddan ayaa loogu talagalay in kor loo qaado tartanka iyo in la hubiyo in Bunka Itoobiya lagu suuq geeyo wadamo aan Bunka soo saran. Si kastaba ha ahaatee, waxay keentay in la waayo suuqyo muhiim ah, sida Hindiya, taasoo si weyn u saameysay soo saarayaasha Bunka.
Daraasad dhawaan la sameeyay ayaa muujisay in mamnuuciddani ay go’doomisay suuqyo dhoofin muhiim ah, taasoo dhaawacday hab-nololeedka beeralayda bunka ee Itoobiya.
Safaaradda Hindiya ee Addis Ababa, iyada oo kaashanaysa Wasaaradda Beeraha ee Itoobiya, waxay soo saartay warbixin cilmi-baaris ah oo suuqa ku saabsan 19-kii Agoosto, 2024. Warbixintaasi waxay iftiimisay fursadaha dhoofinta alaabada kala duwan ee beeraha, oo uu ku jiro bunka,
Itoobiya waxay taariikh ahaan bun cayriin u dhoofin jirtay dalal sida Hindiya, Brazil, iyo Indonesia. Si kastaba ha ahaatee, maqnaanshaha heshiisyada ku saabsan habka dhoofinta wadamada soo saara Bunka ayaa daciifiyay booskeeda suuqa caalamiga ah. Warbixinta ayaa soo jeedisay in iyadoo la hagaajinayo hababka beeralayda iyo la maalgelinayo kaabayaasha, Itoobiya ay dib ugu soo celin karto saamigeeda suuqa Bunka.
Girma Amente, Wasiirka Beeraha ee Itoobiya, ayaa xusay muhiimadda ay leedahay dhoofinta Itoobiya ee Hindiya, taas oo gaartay $80 milyan sanadkii 2022, waxyna qayb ka tahay xiriir ganacsi oo ballaaran oo qiimihiisu gaarayo $2.8 bilyan.
Anil Kumar, Safiirka Hindiya ee Itoobiya, ayaa ballan qaaday inuu sii xoojinayo ganacsiga labada dhinac iyo in xal loo helo caqabadaha haysta dhoofiyeyaasha bunka ee Itoobiya.
Iyadoo Itoobiya ay dadaal ugu jirto sidii ay u gudbi lahayd caqabadahan, diiradda waxay weli saaran tahay hagaajinta tayada bunkeeda, ballaarinta gelitaanka suuqyada, iyo in la hubiyo in faa’iidooyinka ganacsiga ay gaaraan dhammaan dhinacyada ay quseyso ee warshadaha Bunka.
