Wasaaradda Caddaaladda, Diinta iyo Dastuurka ee Maamulka SSC-Khaatumo ayaa xalay ku dhawaaqday baaq rasmi ah oo lagu wargelinayo dhammaan bulshada ku dhaqan deegaanada maamulka in la tukado Salaadda Roob-doonka (Salaatul Istisqaa’), iyada oo laga duulayo xaaladda abaaraha ka jirta gobolka.
Bayaanka oo kasoo baxay Xafiiska Wasiirka Caddaaladda, Diinta iyo Dastuurka, Gen. Cabdi Fataax Maxamed (Xijaar), ayaa lagu sheegay in salaaddan si mideysan looga tukan doono dhammaan gobollada maamulka maalinta Khamiista ah ee ku beegan 3-da Abriil 2025.
“Xafiiska Wasiirka Diinta ,wuxuu ku wargelinayaa dhammaan bulshada reer SSC-Khaatumo in maalinta Khamiista oo ku began 3-da Abriil 2025, ay si mideysan ugu soo baxaan salaadda roob doonta(Salaatul Istisqaa’), si Eebbe aynu u waydiisanno roob iyo raxmaad khayr badan.” Ayaa lagu yiri qoraalka wasaradda.
Bayaanka ayaa si gaar ah ugu baaqay:
- Culimada, ducaadda, iyo mas’uuliyiinta maamulka deegaanka in ay hoggaan ka noqdaan abaabulka iyo hagidda Salaadda Roob-doonka.
- Bulshada reer SSC-Khaatumo in ay si habsami leh, nidaamsan, kuna saleysan akhlaaqda iyo adkaanta diinta Islaamka uga qaybqaataan tukashada salaaddan.
Wasaaradda ayaa ugu dambeyntii ugu baaqday shacabka deegaanka in ay si wadajir ah ugu duceeyaan Ilaahay si uu roob kheyr leh ugu shubo dhulka abaartu saamaysay. Baaqan ayaa imaanaya xilli hay’adaha caalamka ay saadaalinayaan in roobabkii Gu’ga 2025 ay u badan tahay inay yaraadaan, taasoo walaac xooggan ka dhaliyay xaaladda bini’aadantinimo Soomaaliya ay wajaheyso.
