Jabuuti ayaa shalay martigelisay kulan hordhac ah oo gogol-xaar u ah shir ballaaran oo caalami ah, kaasoo diiradda lagu saarayo istaraatiijiyadda maalgeshiga gobolka iyo fursadaha dhaqaale ee ka jira gudaha iyo dibadda Jabuuti. Shirkaas oo la magac baxay Djibouti Forum 2025 ayaa si rasmi ah u dhacaya intii u dhaxeysa 6 ilaa 8 Abriil 2025.
Djibouti Forum-ka ayaa la filayaa inuu noqdo dhacdo muhiim ah oo saameyn weyn ku yeelan doonta kobaca dhaqaalaha gobolka iyo Afrika guud ahaan. Waxaa lagu martigelin doonaa hoggaamiyeyaasha caalamiga ah, maalgashadayaasha waaweyn, iyo siyaasiyiin heerar kala duwan ah, si looga wada hadlo fursadaha iskaashi ee u dhexeeya dowladda iyo ganacsiga gaarka loo leeyahay.
Ujeedka shirkan ayaa ah in la isku xiro daneeyayaasha kala duwan, iyadoo la abuurayo fursado shabakadeed (networking) oo dhex mara ganacsatada, maalgashadayaasha iyo madaxda siyaasadeed. Wuxuu noqon doonaa goob muhiim ah oo lagu lafaguro aragtiyada cusub, istaraatijiyadaha horumarineed, iyo hababka cusub ee lagu xoojin karo iskaashiga dhaqaale.
Sida ay warisay African Business, “Shirku wuxuu ujeedkiisu yahay inuu isku xiro daneeyayaasha isagoo abuura fursado shabakadeed oo u dhexeeya hoggaamiyeyaasha ganacsiga, maalgashadayaasha, iyo siyaasiyiinta.”
Fadhiyo guud iyo dood-wadaagyo ayaa lagu soo bandhigi doonaa intii uu socdo forum-ka, waxaana laga doodi doonaa mowduucyo muhiim ah sida:Xoojinta iskaashiga dowladda iyo ganacsiga gaarka loo leeyahaySaameynta isbeddellada dhaqaale ee caalamka ku leeyihiin gobolka
Istaraatijiyadaha horumarinta waddooyinka ganacsiga iyo isku xirka gudaha Afrika iyo suuqyada caalamiga ah.Shirka waxaa ka qeyb galaya mas’uuliyiin heer sare ah oo ay ka mid yihiin Wasiirka Tamarta iyo Kheyraadka Dabiiciga ee Jabuuti, Madaxweynaha Bangiga Carabta ee Horumarinta Dhaqaalaha ee Afrika, iyo madax kale oo muhiim ah.
Jabuuti ayaa ah dal si weyn u faa’iideystay goobteeda juquraafiyeed ee istiraatijiyadeed, taasoo ka dhigaysa meel muhiim ah oo ay maalgashadayaashu u eegaan. Fursadaha maalgashi ee Jabuuti ayaa si gaar ah uga jirta dhinacyada logistics, tamarta, isgaarsiinta, iyo dalxiiska.
Djibouti Forum 2025 ayaa loo arkaa fursad dahabi ah oo lagu dhiirrigelinayo maalgashi cusub, laguna hormarin karo xiriirka dhaqaale ee u dhexeeya Jabuuti iyo caalamka. Waxaa la filayaa inuu noqdo madal muhiim ah oo ay ka soo baxaan heshiisyo cusub iyo iskaashi horleh oo faa’iido u leh dhammaan ka qaybgalayaasha.
