Hargaysa (Dawan) Wafdi sare oo ka socda Midowga Yurub, oo uu hoggaaminaysay Annette Weber — Wakiilka Gaarka ah ee Midowga Yurub u qaabilsan Geeska Afrika iyo Badda Cas — ayaa maanta kulan la yeeshay Madaxweynaha Somaliland, Cabdiraxmaan Maxamed Cabdillaahi (Cirro), kaas oo ka dhacay Madaxtooyada Somaliland ee Hargeysa.
Sida lagu sheegay war-saxaafadeed rasmi ah oo kasoo baxay Madaxtooyada Somaliland, kulankaasi waxa uu calaamad u ahaa horumar muuqda oo ku saabsan wada-shaqeynta laba geesoodka ah ee u dhaxaysa Somaliland iyo Midowga Yurub. Wadahadallada ayaa diiradda lagu saaray arrimo ay ka mid yihiin nabadda gobolka, amniga badda, dimuqraadiyadda, iyo horumar waara.
Madaxweyne Cabdiraxmaan Cirro ayaa muujiyay mahadnaq uu u hayo taageerada joogtada ah ee Midowga Yurub uu siiyo Somaliland, gaar ahaan dhinacyada dib-u-habeynta hay’adaha dawladda, waxbarashada, kaabeyaasha dhaqaalaha, iyo la qabsiga isbeddelka cimilada.
Sida ay Madaxtooyadu sheegtay, Madaxweynaha ayaa sidoo kale xusay doorka istaraatiijiga ah ee Somaliland ay ku leedahay amniga gobolka, isaga oo tilmaamay in Somaliland leedahay in ka badan 800km oo xeeb ah oo ku fidsan marin-biyoodka muhiimka ah ee Badda Cas iyo Gacanka Cadmeed.
“Somaliland ma aha kaliya ciyaaryahan maxalli ah; waa laf-dhabarta xasilloonida gobolka. Waa in doorkayaga si rasmi ah loogu aqoonsadaa xeerarka amni ee gobolka,” ayuu yiri Madaxweynaha, sida lagu sheegay bayaan rasmi ah oo ka soo baxay Afhayeenka Madaxtooyada.
Annette Weber ayaa qoraal ay soo dhigtay barteeda x ku sheegtay in kulamo ay ku yeelatay Hargeysa iyo Berbera madadaxweynha iyo masuuliyiin kale ayna kawada hadleen isku xirka gobolka.
“Waxaanu ka wada hadalnay xasilloonida Geeska Afrika, amniga Badda Cas, iyo isku xirka dhaqaale ee gobolka si ay dhammaan uga faa’iidaystaan,” ayay tiri.
Inkasta oo Somaliland aan weli si caalami ah loo aqoonsan, haddana Madaxtooyadu waxay caddeysay in Somaliland ay ka go’an tahay inay sii waddo wada-shaqeynta ay la leedahay beesha caalamka, gaar ahaan dhinacyada amniga iyo horumarka waara.
