Addis Ababa (Dawan) – Shirka dib-u-eegista ee Guddiga Wasiirrada Iskaashiga Soomaaliya iyo Itoobiya ayaa si rasmi ah uga furmay magaalada Addis Ababa ee dalka Itoobiya, isagoo ah mid lagu qiimeynayo heshiisyadii ay labada dhinac ku gaareen shirkii ugu horreeyay ee ka dhacay magaalada Muqdisho 5–6 Sebtember 2023.
Wafdiga Dowladda Federaalka Soomaaliya waxaa hoggaaminaya Maxamed Isaaq Fatiir, Agaasimaha Guud ee Arrimaha Bulshada Bariga Afrika ee Wasaaradda Arrimaha Dibadda iyo Iskaashiga Caalamiga. Sida lagu sheegay bayaan ka soo baxay dowladda Soomaaliya, wafdigu waxa uu diiradda saarayaa qiimeynta iyo xoojinta iskaashiga labada dal ee dhinacyada kala duwan sida ganacsiga, horumarinta dhaqaalaha, waxbarashada, caafimaadka, iyo xirfadaha dhalinyarada.
Intii uu shirku socday, Fatiir wuxuu xusay in wada-hadalladu xoogga saari doonaan xoojinta xiriirka dad-to-dad ee labada dal, iyadoo sidoo kale laga hadlayo arrimaha amniga iyo riyooyinka wadajirka ah ee labada shacab si loo horumariyo iskaashi waara. “Wada-xaajoodyadu waxay ujeedadoodu tahay kor u qaadidda iskaashi dadweyne oo qoto dheer,” ayaa lagu yiri war-saxaafadeedka dowladda Soomaaliya.
Dhinaca Itoobiya, Agaasimaha Guud ee Arrimaha Afrika ee Wasaaradda Arrimaha Dibadda, Zerihun Abebe, ayaa soo dhoweeyay wafdiga Soomaaliyeed, isagoo tilmaamay muhiimadda shirkan uu u leeyahay xoojinta xiriirka labada dal. “Shirkan wuxuu sahli doonaa in la sahmiyo fursado cusub oo iskaashi, gaar ahaan ganacsiga, waxbarashada, caafimaadka, shaqada iyo xirfadaha, iyo sidoo kale duulista rayidka,” ayuu yiri Abebe, sida ay sheegtay Wasaaradda Arrimaha Dibadda Itoobiya.
Shirkan ayaa imaanaya xilli sanadkii lasoo dhaafay ay jireen walaacyo diblomaasiyadeed oo ku saabsan xiriirka labada dal, gaar ahaan muranka la xiriira marin-biyoodka badda iyo madaxbannaanida dhuleed, walow markii dambe heshiis diblomaasiyadeed ay dowladda Turkiga ka dhax-bilaawday. Haddana, shirkan ayaa muujinaya isu soo dhowaansho labada dowladood ah.
Sida ay xaqiijiyeen labada dhinacba, waxaa la filayaa inay isla meel dhigaan tallaabooyin lagu hirgelinayo heshiiskii ganacsi ee hore loo saxiixay, iyagoo sidoo kale sahminaya fursado dheeraad ah oo iskaashi lagu xoojin karo.
Natiijooyinka shirka Addis Ababa ayaa la filayaa inay hagaan kulamada wasiirrada ee dambe, iyo jihada iskaashi istaraatiji ah oo labada dal u dhexeeya.
