Bariire (Dawan) – Ciidamada Dowladda Federaalka Soomaaliya oo ay garab siinayaan ciidamada Uganda ee ku sugan Hawlgalka Taageerada iyo Xasilinta Midowga Afrika ee Soomaaliya (AUSSOM) ayaa dib ula wareegay deegaanka Bariire ee gobolka Shabeellaha Hoose, kadib howlgal billowday Jimcihii hore oo socday muddo toddobaad ah, sida ay sheegtay dowladda.
War-saxaafadeed ay soo saartay Wasaaradda Gaashaandhigga ayaa lagu sheegay in in ka badan 100 dagaalame oo ka tirsan Al-Shabaab lagu dilay howlgalka, halka kuwo kalena lagu qabtay nolol. Wasaaraddu waxay intaa ku dartay in ciidamada ay weli wadaan hawlgallo nadiifin ah gudaha iyo hareeraha degmada, ayna gacanta ku dhigeen hub iyo saanad ciidan oo “tiro badan.”
“Wasaaradda Gaashaandhigga waxay ammaanaysaa geesinimada Ciidanka Xoogga Dalka Soomaaliyeed, AUSSOM, iyo taageerada ay bixiyeen saaxiibada caalamiga ah,” ayaa lagu yiri bayaanka, iyadoo lagu daray in faahfaahin dheeraad ah la bixin doono marka xog-ururinta howlgalka la soo gabagabeeyo.
Bariire ayaa muddo dheer lahayd muhiimad istaraatiiji ah, iyadoo ay maamulayeen ciidamada Uganda ee ATMIS intii u dhaxaysay 2019 illaa 15-kii Juun 2024. Bariire ayaa ka mid ahaa saldhigyada ATMIS ay ku wareejisay Ciidanka Xoogga Dalka Soomaaliyeed (CXDS) sannadkii 2024, taas oo qeyb ka ahayd wajiga saddexaad ee wareejinta saldhigyada ay ku sugan yihiin ciidamada ATMIS.
Hase yeeshee, 21-kii Maarso 2025 ayaa Al-Shabaab la wareegay degmada. Sheegashada dowladda ee ah inay dib-u-qabsasadeen ayaa imaanaysa maalmo kadib markii 3-dii Agoosto 2025 Ergeyga Gaarka ah ee Guddoomiyaha Guddiga Midowga Afrika (SRCC) iyo Madaxa AUSSOM, El Hadji Ibrahima Diene, uu sheegay in AUSSOM iyo CXDS ay ka go’an tahay inay dib u qabsadaan Bariire iyo deegaannada kale ee weli gacanta ugu jira Al-Shabaab.
Al-Shabaab weli kama aysan hadlin sheegashada dowladda.
