NAIROBI (Dawan) – Soomaaliya ayaa ka mid ah afar dal oo Afrika ah oo saddexda bilood ee soo socda wajahaya khatar nafaqo-darro carruurta ah, sababo la xiriira hoos u dhaca deeqaha gargaarka, sida ay ka digeen hay’adaha caalamiga ah.
Hay’adda Save the Children ayaa sheegtay in Nigeria, Kenya, Soomaaliya iyo Koonfurta Suudaan ay halis ugu jiraan gabaabsi degdeg ah oo ku yimaada cunnada lagu daaweeyo carruurta nafaqo-darrada daran (RUTF). Sida ay hay’addu sheegtay Cuntadan, oo ka samaysan laws, sonkor, caano budo iyo fitamiino, ayaa 30 sano ee la soo dhaafay lagu badbaadiyay carruur malaayiin ah, iyadoo aan u baahnayn qaboojin laguna isticmaali karo guriga.
Nigeria waxaa ku nool ku dhowaad 3.5 milyan oo carruur ah oo nafaqo-darro daran qaba, iyadoo dalkaasi u baahan yahay 629,000 kartoon oo RUTF ah balse uu helay 64% kaliya. Kenya waxay u baahan tahay 105,000 kartoon ilaa dhammaadka sanadkan, hase yeeshee sahaydu way gabaabsi noqon kartaa bisha Oktoobar. Soomaaliya waxaa khatar ku jira 1.8 milyan oo carruur ah, iyadoo kaliya 39% maalgelinta lagama maarmaanka ah la helay. Koonfurta Suudaan, tirada carruurta nafaqo-darrada daran qabta ayaa sanadkan korodhay 10%, iyadoo xarumo badan la xiray sababo la xiriira deeqo yaraaday.
Save the Children ayaa qiyaastay in 15.6 milyan oo qof oo ku kala nool 18 dal ay lumin karaan cuntooyinkan naf-badbaadinta ah sanadka 2025, oo ay ku jiraan 2.3 milyan oo carruur ah.
“Bal qiyaas inaad tahay waalid carruurtiisu si daran u nafaqo-xun tahay. Haddana qiyaas in cuntada keliya ee ilmahaaga ka badbaadin karta dhimasho aysan jirin marka loo baahdo,” ayay tiri Yvonne Arunga, Agaasimaha Gobolka ee Save the Children Bariga iyo Koonfurta Afrika.
Hay’adda ayaa ugu baaqday deeq-bixiyeyaasha inay kordhiyaan taageerada dhaqaale si looga hortago gabaabsi cusub lana xaqiijiyo in carruurta la daweeyo.
